Գյումրիի ավագանին սեպտեմբերի 16-ի նիստում չեղարկեց «Գյումրու օր» ամենամյա տոնակատարությունը: Նիստի օրակարգում ընդգրկված էր նաև տոնակատարության կազմակերպման և անցկացման հարցը։ Քաղաքապետարանի մշակույթի բաժնի պետ Լիլիթ Թովմասյանը զեկուցման ժամանակ նշել է, որ միջոցառման կազմակերպման համար անհրաժեշտ է 6 միլիոն դրամի հատկացում։ Քվեարկությունից առաջ առաջարկով հանդես է եկել Գյումրիի քաղաքապետ Վարդան Ղուկասյանն՝առաջարկելով հանել հարցը օրակարգից։
«Առաջարկում եմ հանել այս հարցը, որովհետև զգում եմ՝ տրամադրությունն էն չի, դիմացն էլ ցուրտ է»,- իրեն բնորոշ ոճով հայտարարել է քաղաքապետը։
Տոնակատարությունը չեղարկելու նախաձեռնությունը պաշտպանել է նաև «Իմ հզոր համայնք» խմբակցության ղեկավար Ռուբեն Մխիթարյանը։ Արդյունքում՝ առանց քվեարկության, հարցը հանվել է օրակարգից, և «Գյումրու օր» տոնակատարությունը պաշտոնապես չեղարկվել է։
MediaHub-ը կապ հաստատեց Ռուբեն Մխիթարյանի հետ, ով էլ մեզ հետ զրույցում ներկայացրեց իրավիճակը։
«Հիմանական պատճառը եղանակային պայմաններն են։ Հոկտեմբերի 18-ին երեկոյան արդեն շատ ցուրտ է լինում, բայց ուզում եմ գալ ամենասկզբից։ Բոլոր հարցերը նախ քննարկվում է մշակույթի հանձնաժողովում։ Հանձնաժողողվում ներկայացված է եղել մի քանի հարց, որոնցից մեկն էլ եղել է «Գյումրու օր»-ը, որտեղ նշված է եղել՝ գումար տրամադրելու խնդրանք երկու մշակութային միջոցառման, ինչին մենք բոլորով (ՔՊ-ն ներառյալ), բացասական եզրակացություն ենք տվել, պատճառաբանելով՝ քաղաքի բյուջեն անսահման չի և այդ գումարները կարելի է ուղղել այլ բաների»։
Նրա խոսքով՝ երկու միջոցառումներից մեկը Նկարիչների միությանն էր, որը պետք է տեղի ունենար սեպտեմբերի 27-ին, սակայն դա չեղարկվել է՝ այդ օրը 44-օրյա պատերազմի տարելիցն է։ Մխիթարյանը նշեց՝ բոլորը կողմ են եղել, որ այդ միջոցռմանը գումար չտրամադրեն, հանձնաժողովը տվել է բացասական եզրակացություն։
«Երբ եղել է Գյումրու օրվան նվիրված քննարկումը, մենք նայել ենք բյուջեն, որտեղ գրված է եղել 14 մլն դրամ, որից 8 մլն-ը պիտի բեմին տրամադրվեր, 4,5 մլն՝ արտիստներին, մնացած գումարը՝ այլ ծախսերի։ Հարցրել ենք՝ միջոցառման օրը՝ հոկտեմբերի 18-ը, պատկերացնու՞մ եք, որ ցուրտ օր է լինելու, և երկրորդը՝ ո՞վ է երգելու։ Արդյո՞ք 14 մլն դրամով հնարավոր է լիարժեք, Գյումրուն հարիր միջոցառում կազմակերպել, այն դեպքում, երբ գիտենք, թե Կառավարությունը Ֆեստիվառի կազմակերպմանը որքան գումար է տրամադրում։ Հիմա համեմատենք՝ կարո՞ղ է սա որակական առումով մրցունակ լինել»,- նշեց նա։
Ըստ այդմ, առաջարկով են հանդես եկել՝ ինչ-որ հետաքրքիր բան կազմակերպել Ամանորին։
Ռուբեն Մխիթարյանը նաև նշեց, որ ավագանու նիստից առաջ Վարդան Ղուկասյանը հանձնաժողովի անդամներին հրավիրել է իր մոտ (որի շարքերում ՔՊ-ն չկա), առաջարկել է «քաղաքի օր» միջոցառումն իրականացնեն, ուղղակի սահմանված գումարը նվազեցնեն՝ կրկին հաշվի առնելով եղանակային պայմանները, իսկ ավելացած գումարը կտրամադրվի Ամանորին ընդառաջ կազմակերպվող միջոցառմանը։
«Այս որոշման հետ բոլորը համաձայնեցին։ Հետո սկսվում է նիստը, այդ ընթացքում, երբ հերթը հասնում է այս հարցին, քաղաքապետն առաջարկում է այն հանել քննարկումից։ Երբ քաղաքապետը այդ հարցը քննարկումից հանեց, ոչ ոք՝ ՔՊ-ն նույնպես, դեմ չարտահայտվեց»,- հավելեց Մխիթարյանը։
Սակայն նշեց, որ «Քաղաքացիական պայմանագիր» խմբակցության ղեկավար Սարիկ Մինասյանը նախաձեռնել է արտահերթ նիստ. հարցը շարունակում է մնալ օրակարգում։ Սպասենք զարգացումների։
Էմմա Մարտիրոսյան