Գրեթե ամեն օր Երևանում երթևեկության փոփոխություններ են կատարվում․ ավելացվում են հանրային տրանսպորտի համար առանձնացված գծեր, ինչն առանց այդ էլ ծանրաբեռնված քաղաքում նոր ու ավելի մեծ խցանումների պատճառ է դարձել։ Բացի առանձնացված գծերից կան նաև առանձնացված լուսացույցներ հանրային տրանսպորտի համար, օրինակ՝ Մաշտոցի պողոտայում։
Այս բոլոր փոփոխությունները, որոնք Երևանի քաղաքապետարանը այդքան սիրելի «բարեփոխումներ է» անվանում, հարուցել են վարորդների դժգոհությունը:
MediaHub-ը բազմաթիվ բողոքներ է ստացել, թե ավտոբուսի վարորդները շատ դեպքերում չեն վարում իրենց համար հատուկ առանձնացված գծերով, վարում են մյուս գծերով՝ բարդացնելով առանց այդ էլ խցանումներից ու փոփոխություններից նյարդային վիճակում գտնվող վարորդների կյանքը:
Քաղաքացիներին հետաքրքիր է՝ արդյո՞ք ավտոբուսի վարորդներին տուգանում են, եթե իրենք չեն վարում իրենց համար առանձնացված գծերով և խախտումներ են անում, սակայն, իրենց համար նախատեսված գծում՝ ավտոբուսի գծում ոչ մի խոչընդոտ չկա։
MediaHub-ը հարցը հասցեագրեց ՆԳՆ մամուլի քարտուղար Նարեկ Սարգսյանին: «Ցանկացած խախտում իրականացնելու համար, ինչպես քաղաքացիական մեքենաների վարորդները, այնպես էլ հանրային տրանսպորտի վարորդներն ենթարկվում են վարչական պատասխանատվության»,- ասաց Սարգսյանը։
Նշենք, որ «Երևանի ավտոբուս» ՓԲԸ-ի մամուլի քարտուղար Գեղամ Ասատրյանը MediaHub-ի հետ զրույցում հայտնել էր․
«Ամենօրյա ռեժիմով մոտ 1300 վարորդի հրահանգավորվում է, հրահանգիչների միջոցով ծանուցվում են նոր ավտոբուսի գծերի մասով։ Այժմ նոր մեխանիզմ ենք ներդրել՝ գործնական և տեսական դասընթացներ են իրականացնում ոլորտի մասնագետները, շուտով պատրաստ կլինի դասասենյակը, որտեղ էլ ավելի հարմար կլինի անցկացնել այդ դասընթացները։ Ի՞նչ է տալու դա մեզ. տեսական դասընթացները՝ վարորդները, դասընթացներն անցնելուց հետո ամբողջությամբ կտիրապետեն ճանապարհային երթևեկության նշաններին, քանի որ ինչքան էլ մարդ ունի վարորդական վկայական, բայց 10-ից գոնե 6–ը, մեր հասարակության մեջ, կաղում են նշաններից, իսկ առանձնացված գոտիով երթևեկելու համար պետք է առաջնային նշանները ճանաչել»։
Ինչ վերաբերում է գործնական դասերին, Ասատրյանը նշել էր, որ դրանք կատարվում են ամենօրյա ռեժիմով, հատուկ հրահանգիչ կա, ինչպես նաև, անվտանգ երթևեկության ծառայության պետը, նույնպես, անձամբ մասնակցում է դասընթացներին։
Մարիաննա Արամյան