Քիչ առաջ ԱԺ «Պատիվ ունեմ» խմբակցությունը հայտարարեց, որ Փաշինյանին անվստահություն հայտնելու գործընթացին միս ու արյուն է տրվում, վարչապետի թեկնածու իրենք առաջադրում են Մասիսի համայնքապետ Դավիթ Համբարձումյանին:

Արդյո՞ք խորհրդարանական ընդդիմությունը կհամախմբվի Համբարձումյանի թեկնածության շուրջ, «Հայաստան» խմբակցությունը կմիանա՞ գործընթացին. MediaHub-ը փորձեց պարզել` զրուցելով խմբակցության ղեկավար Սեյրան Օհանյանի հետ:

«Ես նոր եմ կարդացել հայտարարությունը: Հաջորդ շաբաթ «Հայաստան» խմբակցությունը կհայտնի իր դիրքորոշումը: Պետք է քննարկենք հարցը»,- նշեց Օհանյանը:

Հարցին, թե ինքն անձամբ ինչպե՞ս է վերաբերում Համբարձումյանի թեկնածությանը, Սեյրան Օհանյանը պատասխանեց` իր մասին որևէ բացասական կարծիք չունի:

Նշենք, որ Դավիթ Համբարձումյանը հանդես է եկել հայտարարությամբ, որում նշվում է. «Սա պարտավորեցնող ու պատվաբեր առաջարկ է, որը ես ընդունել եմ խորապես գիտակցելով պատասխանատվությունը, վտանգները և իհարկե մեր բոլորի երազած հաղթանակի ռեալ հնարավորությունը: Իշխանազավթման առաջին օրից ձեր բոլորի աչքի առաջ ամեն ջանք գործադրել եմ աղետը կանխելու կամ գոնե հեռացնելու ուղղությամբ: Ինձ ու համարյա իմ բոլոր հարազատներին շինծու գործերով բանտարկել են, սակայն իմ կամքի վրա ազդելն անհնար է:

Պայքարի մեջ ես վերկուսակցական մոտեցման կողմնակից եմ: Ինքս բոլոր ընդդիմադիրներին անկեղծ համախմբման կոչ եմ անում և պատրաստ եմ արձագանքել նման բոլոր կոչերին: Ես հայ տղամարդ եմ ու զերծ եմ անառողջ ամբիցիաներից: Նպատակս միայն մեկն է՝ ազատվել չարիքից»:

Նարե Գնունի