ԱԺ «Հայաստան» խմբակցությունը մտադիր է Ազգային ժողովի աշնանային նստաշրջանում ՀՀ գլխավոր դատախազ Աննա Վարդապետյանին անվստահություն հայտնելու գործընթաց մեկնարկել։ Այս մասին հրապարակում եղավ մամուլում, սակայն նախագիծն ու գաղափարը դեռ միս ու արյուն չի ստացել։ 

«Հայաստան» խմբակցության պատգամավորներն առայժմ չեն ցանկանում շատ բան բացահայտել այս նախաձեռնության մասով, հավանաբար չգիտեն էլ՝ ինչպես են իրագործելու։ Պատգամավոր Աննա Գրիգորյանից MediaHub-ն այսօր մի կերպ կարողացավ այս թեմայով մի երկու բառ «պոկել», քանի որ տիկին Գրիգորյանը համառորեն չէր ցանկանում խոսել այս թեմայով ու մանրամասնել՝ ինչպես են պատրաստվում դատախազին անվստահություն հայտնել, եթե նույն կերպ կարող էին Նիկոլ Փաշինյանին իմպիչմենտի ենթարկել, բայց չարեցին, որովհետև «բավարար ձայներ չունեին»։ 

-Տիկին Գրիգորյան, մամուլում գրվեց, որ գլխավոր դատախազին անվստահություն հայտնելու գործընթաց եք ուզում նախաձեռնել։ Ի՞նչ փուլում է դա, ո՞ւմ նախաձեռնությունն է։ 

-Դեռ դա առաջիկայում քննարկվելիք հարց է, այսինքն՝ խմբակցության նիստին կքննարկենք այդ հարցը։ Դրանից ավել ոչ բան չեմ կարող ասել։

-Իսկ ի՞նչն է առիթ տվել, որ գլխավոր դատախազին անվստահություն հայտնեք։ 

-Ես դրանից ավել որևէ բան չեմ պատրաստվում ասել, առաջիկայում խմբակցության նիստ կլինի, և պարզ է, որ մեր օրակարգը ամբողջությամբ կքննարկվի, այդ թվում՝ նաև այդ հարցը։ 

-Իսկ «մեծարգո վարչապետին» անվստահություն հայտնելու հարցը չե՞ք քննարկելու։

-Ես սրանից ավել որևէ բան չեմ կարող ասել։ 

-Պարզապես, ձեր մրցակից գործընկերներն ասում են, որ դատախազին անվստահություն հայտնելու համար ունեք բավարար ձայներ և ռեսուրս, իսկ վարչապետի համար չունե՞ք։

-Մենք էդ բոլոր հարցերը քննարկելու ենք, իրականում, զուտ տեխնիկապես, երեկ էլ նայում էինք, ու, կարծես թե, միայն խմբակցությունն ինքը իր բավարար ձայներով կարող է դատախազին անվստահություն հայտնելու գործընթաց իրականացնել՝ ի տարբերություն վարչապետին անվստահության գործընթացի, բայց սա դեռ պետք է լրացուցիչ քննարկվի, դրա համար եմ ասում՝ մենք սա լրացուցիչ կքննարկենք, կհասկանանք՝ որքանո՞վ է հնարավոր կամ ոչ։ 

-Այսինքն՝ դատախազի մասով միայն ձեր խմբակցության ձայները բավարա՞ր են։

-Հիմա ես այս պահին պնդում չեմ անի, որովհետև այդ օրենքն անձամբ ես չկարդացի, բայց իմ գործընկերներից մեկը, կարծես թե, ասում էր, որ մի ֆրակցիայի ձայները բավարար են այդ գործընթացը մեկնարկելու համար։ Բայց նորից եմ ասում՝ մեզ պետք է դրա լրացուցիչ քննարկում անցկացնել։ 

-Իսկ ե՞րբ պարզ կդառնա, այս նստաշրջանին միս ու արյուն կստանա՞ այդ գաղափարը։ 

-Դե, պարզ է, չէ՞, որ մինչև նիստերի մեկնարկը մենք ֆրակցիայի նիստ ենք ունենալու, քննարկումներ ենք ունենալու։ 

-Իսկ ե՞րբ եք անելու ֆրակցիայի նիստ։ 

-Դա չեմ կարող հրապարակայնացնել։ 

Վահե Մակարյան