Նախօրեին Առողջապահության նախարարությունում անցկացվում էր Սբ. Գրիգոր Լուսավորիչ ԲԿ-ի տնօրենի ընտրության մրցույթը։ Երկու թեկնածու կար ինքնաառաջադրված, սակայն, նրանցից և ոչ մեկը չի հաղթահարել անցողիկ շեմը։
Նշենք, որ տնօրենի պաշտոնին հավակնողներից մեկը ՔՊ-ական նախկին պատգամավոր Նարեկ Զեյնալյանն է եղել, որը վերջին ամիսներին այս ԲԿ-ի տնօրենի ԺՊ-ն էր, և միևնույն ժամանակ առողջապահության նախարար Անահիտ Ավանեսյանի նախընտրելի թեկնածուն. Այդպես են խոսում թե՛ իշխանական շրջանակներում, թե՛ առողջապահության ոլորտի կուլուարներում: Իսկ տնօրենի պաշտոնի երկրորդ հավակնորդը Նարեկ Վանեսյանն էր, որը առողջապահության նախկին նախարար, ներկայիս սոցնախարար Արսեն Թորոսյանի սրտի թեկնածուն է համարվում։
MediaHub-ի տեղեկություններով՝ Վանեսյանի ելույթն ավելի լավն է եղել, հանձնաժողովը նրան ավելի է հավանել, քան Զեյնալյանին։ Ասում են՝ երկու բառ չի կարողացել իրար կապել, բժշկական տերմինաբանությանը չի տիրապետել, ինչը մասնագիտական հանրույթին բավականին զարմացրել է՝ հաշվի առնելով թե՛ վերջին ամիսների աշխատանքը ԲԿ-ում, թե՛ վերջին տարիներինը՝ ԱԺ-ում, պրոֆիլային հանձնաժողովում: Բացի այդ, հանձնաժողովին դուր չի եկել նրա ինքնավստահ վիճակը. կիսաթիկնած դիրքով է եղել, իրեն «կինոյի տղայի» դերում զգացել։
Ըստ մեզ հասած տեղեկությունների՝ թեև Զեյնալյանն ակնհայտ վատ ելույթ է ունեցել, ու հանձնաժողովը շատ ուզելու դեպքում էլ չէր կարող նրան անցկացնել, հրահանգ է եղել Վանեսյանին ևս չանցկացնել։ Դրա համար հանձնաժողովը փորձել է «գոտկատեղից ներքև» հարված հասցնել. սկսել են քովիդի շրջանում Վանեսյանի քայլերից կառչել՝ հարց հնչեցնելով, թե ինչո՞ւ է համաճարակի ժամանակ ինքը դիմում գրել ու դուրս եկել քովիդի կենտրոնից, որին ի պատասխան Նարեկ Վանեսյանը նշել է՝ 140 օր տուն չի գնացել, մոտը սպառում է եղել, բացի այդ ֆինանսավորում չի եղել։ Այս պատասխանով էլ նեղն են գցել թեկնածունին, ասելով, թե այս դեպքում կասկած կա, որ «Սբ. Գրիգոր Լուսավորիչ» ԲԿ-ից էլ ինքը կգնա, եթե ֆինանսավորում չլինի։ Այդպես, կեսկատակ-կեսլուրջ Վանեսյանին ասել են՝ «գնա, դասախոսություններդ կարդա»։ Նարեկ Զեյնալյանին էլ ասել են՝ տպավորություն է, որ այս փուլում ինքը չի պատկերացնում, թե ինչպես պետք է զարգացնել ԲԿ-ն։
Արդյունքում՝ Նարեկ Զեյնալյանը շարունակում է մնալ ԲԿ-ի տնօրենի ԺՊ, չնայած, որ տարրական հարցերի չի կարողացել պատասխանել։ Առջևում էլ նոր մրցույթ է սպասվում...
Նարե Գնունի