Ալիևը չի որոշում, թե ռուս խաղաղապահներն ինչքան պետք է մնան Արցախում։ Այս մասին այսօր MediaHub.am-ի հետ զրույցում ասաց Արցախի ԱԺ «Ազատ հայրենիք-ՔՄԴ» խմբակցության պատգամավոր Արամայիս Աղաբեկյանը՝ մեկնաբանելով Ադրբեջանի նախագահ Իհլամ Ալիևի այն հայտարարությունը, թե Ղարաբաղում տեղակայված ռուս խաղաղապահները ժամանակավորապես են այնտեղ։ 

«Մենք նրանց այս դասը տալիս ենք, և հուսով ենք, որ նրանք վերջապես կհասկանան դա և կզբաղվեն իրենց ներքին գործերով, կդադարեն տենչալ մեր հողերը, Ղարաբաղը։ Ղարաբաղը մեր հողն է, այնտեղ տեղակայված ռուս խաղաղապահները ժամանակավորապես են այնտեղ։ 2020 թվականի նոյեմբերի 10-ի հայտարարության մեջ նշված է նրանց գտնվելու ժամկետը»,- ասել էր թշնամի երկրի առաջնորդը։ 

«Եթե Ալիևը որոշեր, թե մեր երկրում ինչ պետք է լինի, ապա նոյեմբերի 9-ի փաստաթուղթ չէր լինի, բանակցային հարթակներ չէին լինի։ Ալիևի այսպիսի հայտարարությունը պարզապես դիվանագիտական քայլ է, որպեսզի զիջումներ կորզի հայկական կողմից, սակայն սա պետք է դիտարկենք նաև ներքին քարոզչություն, որն անում է իր ժողովրդի համար։ Ոչ ոք չի կարծում, որ Ալիևի այս հայտարարությունից հետո ռուսական կողմը հեշտությամբ համաձայնելու և Ադրբեջանին թույլ է տալու ասել՝ դուրս եկեք Արցախից»,-ասաց նա։

Դիտարկմանը, թե վերջերս այս մասին նաև ՀՀ վարչապետ Նիկոլ Փաշինյանն էր հայտարարել, թե խաղաղապահների մանդատը երկարացնելու առաջարկը չի ընդունվել, պատգամավորն արձագանքեց․ «Այս պահին ընդունել կամ չընդունելու խնդիր չկա, քանի որ բավական ժամանակ կա: Սահմանված ժամանակը կլրանա, հետո կտեսնենք, թե ինչ քայլեր են պետք։ Այս պահին պարզապես կարող ենք քաղաքական եզրահանգումների գալ, բայց չեմ կարծում, որ ռուսական կողմը հեշտությամբ կզիջի խաղաղապահ առաքելությունը և դուրս կգա Արցախից»։ 

Խոսելով պատերազմից 2 տարի անց հանրության հոգեվիճակի մասին՝ արցախցի պատգամավորն ընդգծեց, որ պարտվածի հոգեբանությունը պետք է դուրս գա և հետագա լուծումների համար գործուն քայլեր պետք է ձեռնարկվեն։ 

Լիաննա Թորոսյան