Անձնապես ընտանիքին չեմ ճանաչել, տեղեկացրել են, որ նորմալ, շնորհքով ապրող ընտանիք էին․ սպանության վարկածը չեմ կարող մեկնաբանել։ Այս մասին այսօր MediaHub.am-ին  փոխանցեց Արթիկ խոշորացված համայնքի ղեկավար Անանիկ Ոսկանյանը՝ մեկնաբանելով Պեմզաշեն գյուղի տներից մեկում տեղի ունեցած ողբերգական դեպքը։ 

Նշենք, որ համայնքի տներից մեկում այսօր հայտնաբերվել են 31-ամյա կնոջ և 2 երեխաների դիերը։ 

Ըստ մամուլի՝ մահացածներն են 31-ամյա Զարինե Մ-ն, 12-ամյա Կարինեն և 8-ամյա Սարգիսը, որոնց ամբողջական տվյալները ոստիկանությունն ու քննչական բաժինը պարզում են։

«Ոստիկանապետի հետ խոսել եմ, ոստիկանական խումբն աշխատում է, աշխատանքից հետո համապատասխան ծառայություններն արդյունքները կտեղեկացնեն։ Ես էլ շատ տեղյակ չեմ, սպասում եմ ինձ էլ մանրամասներ հայտնեն»,-ասաց նա։

Ընդգծենք, որ համայնքից սպանության վարկածը չեն բացառում։ MediaHub.am-ին գյուղի բնակիչներից մեկը պատմեց, որ «Սևակը շատ ադեկվադ, նորմալ մարդ է, կինն էլ մեր առողջության կենտրոնում էր աշխատում։ Լավ ընտանիք էին, ճանաչում էի, տարաձայնություններ չեմ նկատել, որ ունենան»։

Մանրամասները՝ ավելի ուշ։

Լիաննա Թորոսյան