Գլխավոր շտաբի նախկին պետ, գեներալ-գնդապետ Մովսես Հակոբյանը, որ Սուրեն Պապիկյանի պաշտպանության նախարար դառնալու առնչությամբ հայտարարել էր, թե նա Կառավարության անդամներից նախարարի պաշտոնը զբաղեցնելու համար լավագույն թեկնածուն է եւ կարծիք հայտնել, որ Պապիկյանը որոշակի ադեկվատ  գործողություններ կնախաձեռնի նախարարությունը կարգի բերելու համար, չի ընդունում, որ ինքն ու Պապիկյանը լավ հարաբերությունների մեջ են։

Մինչդեռ, Պաշտպանության նախարարության MediaHub-ի աղբյուրի փոխանցմամբ՝ Սուրեն Պապիկյանը ռազմական հարցերի շուրջ երբեմն խորհրդակցում է Մովսես Հակոբյանի հետ, որն, ի դեպ, նոյեմբերի 9-ի եռակողմ հայտարարությունից հետո առաջին բարձրաստիճան զինվորականն էր, որ ասուլիս տվեց ու սկանդալային հատարարություններ արեց 44-օրյա պատերազմի մասին։

Նա մասնավորապես հայտնել էր, որ Նիկոլ Փաշինյանը պատերազմի երրորդ օրը կանգնեցրել է բանակի համալրումն ու կամավորականներին ուղարկել  առաջնագիծ, նշել էր, որ պատերազմում պարտության ամենամեծ պատճառը ղեկավարումն է, անգրագիտությունը, պատերազմի արվեստին ու ղեկավարման համակարգին չտիրապետելը։ Ըստ Հակոբյանի հայտարարության՝ գործող Կառավարությունը 2018 թվականին փոխել է սպառազինության ձեռքբերման ռազմական պլանը։ Մովսես Հակոբյանը պատմել էր, որ պատերազմի ընթացքում հրամանատարական կետում է գտնվել նաեւ Փաշինյանի կինը՝ Աննա Հակոբյանը, որն իրավունք չի ունեցել այդտեղ գտնվելու։ 

Մովսես Հակոբյանից փորձեցինք հասկանալ ենթադրյալ խաղաղության համար կնքված նոյեմբերի 9-ի եռակողմ հայտարարությունը որքանո՞վ խաղաղություն բերեց հայ-ադրբեջանական, արցախա-ադրբեջանական սահմանին, տեղյա՞կ է արդյոք՝ ինչ վիճակում են Զինված ուժերը՝ մարտունակության իմաստով։

-Ես այլեւս քաղաքական հարցեր չեմ մեկնաբանում, դիմեք քաղաքական գործիչներին։

-Ռազմական հարցերը մեկնաբանեք։

-Ռազմական հարցերը մեկնաբանել եմ, ասելու ուրիշ բան չունեմ, իրավիճակին չեմ տիրապետում։ 

-Բանակի մարտունակությանն էլ չե՞ք տիրապետում։ 

-Իհարկե ոչ, ես որտեղի՞ց պիտի տիրապետեմ մարտունակությանը

-Տեղեկություն կա, որ ՊՆ նախարարի հետ լավ հարաբերությունների մեջ եք, Սուրեն Պապիկյանը ձեզնից երբեմն խորհուրդներ է հարցնում։

-Ձեր տեղեկությունը սխալ ա։ 

Լիա Սարգսյան