Ցավալիորեն, Ադրբեջանի հաղթական շքերթին ենք ականատես լինում այսօր, հրավառություն են անում։ Ալիևն էլ հպարտորեն Շուշիի քաղաքապետարանի դիմաց կանգնում։ Մենք էլ մայիսի 9-ն էինք շուքով նշում, փառատոններ էինք կազմակերպում. հիմա մեր հաղթանակն անցել է իրենց, հաղթել են, պիտի անեն։ Այս մասին այսօր MediaHub.am-ի հետ զրույցում ասաց Շուշիի քաղաքապետ Արծվիկ Սարգսյանը՝ խոսելով Շուշիի անկման, նոյեմբերի 9-ի փաստաթղթի ստորագրումից 2 տարի անց Արցախի և Հայաստանի շուրջ զարգացումների մասին։

«Այսօր էլ Ալիևը մատ թափ տալով կխոսի մեզ հետ, վաղն էլ։ Հիմա մեզ միայն միասնական լինելն է մնում, որ քայլեր անենք այդ ուղղությամբ․ Արցախ, Հայաստան, Սփույռք, պառակտումը պետք է վերանա, որ ուժեղանանք, որ դրանց արժանի պատասխանը տանք։ Արծիվ են դառել դրանք, բա էն ժամանակ ո՞ւր էին, վախեցած ապրում էին»,-ասաց նա։ 

Խոսելով ՀՀ և Արցախի իշխանության բռնած ուղու մասին՝ Սարգսյանն ընդգծեց, որ բավարար է այն, ինչ արվում է այսօր, քանի որ գլխավոր որոշումներում հայկական կողմը պարզապես զիջումների է գնում։ «Ընդդիմություն, իշխանություն, խորհրդարան․ անգամ ներսում են իրենք տարանջատված, Արցախն էլ հետին պլան են մղում: Մեկն ասում է՝ Արցախը մեր շալակն է ելել, պետք է իջնի, ցավն այն է, որ բարձր մակարդակներով են այդ մասին խոսում, ԱԺ-ում են հայտարարում։ Իշխանության տրամադրվածությունը հասկանում ենք, այն էլ ուզում են հասարակության մեջ նույնը սերմանեն, թշնամու ջրաղացին ջուր են լցնում։ Ժողովուրդն էլ դեպի մոռացման ու պառակտման է գնում»,-ընդգծեց քաղաքապետը։ 

Լիաննա Թորոսյան