ԵՄ երկրները պետք է «ավելի արագ աշխատեն» էներգետիկ ինտերվենցիաների ուղղությամբ, որպեսզի համաձայնության գան էներգետիկ շուկաներում միջամտությունների շուրջ եւ աջակցեն սպառողներին եւ բիզնեսին, որոնք տուժել են ռուսական գազի մատակարարումների կրճատումից: Այս մասին Reuters-ին հայտնել է Պորտուգալիայի ֆինանսների նախարար Ֆերնանդո Մեդինան։
Նրա խոսքով՝ միջամտությունը կարող է սուբսիդիաների կամ գնային սահմանափակումների ձեւ ընդունել, բայց պետք է իրականացվի մոտ ժամանակներս, քանի որ ներքին քաղաքականությունը չի կարող այդքան հեռու գնալ էներգետիկ ճգնաժամի հետեւանքների մեղմացման հարցում:
ԵՄ-ն պայքարում է էներգակիրների բարձր գների դեմ, որոնք առաջացնում ինֆլյացիա եւ մեծացնում ռեցեսիայի վտանգը։ Եվրոպական էներգետիկայի նախարարները կրկին կհանդիպեն նոյեմբերի 24-ին էներգետիկ շուկայի միջամտությունների քննարկման հերթական փուլի համար, որը, ամենայն հավանականությամբ, կներառի հեղուկացված բնական գազի (ՀԲԳ) գնի այլընտրանքային ուղենիշ եւ գազի կամավոր համատեղ գնում:
ԵՄ երկրները, ներառյալ՝ Ֆրանսիան, Իսպանիան եւ Իտալիան, ցանկանում են ներմուծել գազի գների շեմ, որը նման է Իբերիական մեխանիզմին, որը, ԵՄ պաշտոնյաների առաջարկով, կարող է ֆինանսավորվել SURE բլոկի սխեմայի նման համատեղ վարկերի միջոցով։
Այնուամենայնիվ, Գերմանիան, Դանիան եւ Նիդեռլանդները դեմ են գների սահմանափակմանը՝ հղում անելով մատակարարման անվտանգության հետ կապված մտահոգությունները։
Մեդինան ասել է, որ ֆինանսավորման ոլորտում առաջընթաց է գրանցվել: «Պարզ փոխառություններով տարաձայնությունների մակարդակն այնքան էլ բարձր չէ»,-ասել է նա։
Նա ողջունել է երկարաժամկետ հեռանկարում Բարսելոնայի եւ Մարսելի միջեւ ստորջրյա խողովակաշար կառուցելու մասին Իսպանիայի, Ֆրանսիայի եւ Պորտուգալիայի առաջարկը։
NEWS.am