Տեսնում ենք Ադրբեջանի շարունակվող ագրեսիվ քաղաքականությունը, որն անընդհատ աճել է նաև 2020 թվականի պատերազմից առաջ և հետո, ու ես կարծում եմ, որ այո՛, հիմա մեծ է էսկալացիայի հավանականությունը և՛ ՀՀ սահմանի երկայնքով, և՛ ԼՂՀ-ում։ Այս մասին այսօր հրավիրված ասուլիսի ժամանակ ասաց ՀՀ վարչապետ Նիկոլ Փաշինյանը՝ պատասխանելով լրագրողի այն հարցին, թե արդյո՞ք Հայաստանը կանգնած է նոր՝ լայնածավալ պատերազմի նախաշեմին և որո՞նք են Ադրբեջանին զսպող մեխանիզմները, որքա՞ն երկար կարող են այդ մեխանիզմները գործադրվել։
«Իմ եզրակացությունը Ադրբեջանի ավելի ու ավելի ագրեսիվ դարձող հռետորաբանությունից է և, իհարկե, կան որոշակի այլ տվյալներ։ Զսպման մեխանիզմների մասին․ մենք համոզված ենք և 100 տոկոս գիտենք՝ ՀՀ-ն չէ, որ նախաձեռնում է ագրեսիվ գործողություններ և էսկալացիա։ Սա է պատճառը, որ ՀՀ-ն համաձայնվեց կամ որոշում կայացրեց հրավիրել ԵՄ դիտորդներին։ Թե՛ 2020 թվականի պատերազմից առաջ, թե՛ դրանից հետո Ադրբեջանը ցանկացած էսկալացիա բացատրում էր Հայաստանի գործողություններով, մենք, ի վերջո, հասկանալով, որ հարցեր ենք ստանում նաև ԵՄ-ի մեր գործընկերների կողմից, ասացինք՝ դեմ չենք, եթե դուք դիրտորդներ ուղարկեք, որպեսզի մեր տեղեկատվության վրա հիմնվելու անհրաժեշտություն չունենաք, որպեսզի դուք տեղից տեղեկատվություն ունենաք»,-ասաց նա։
Փաշինյանը նշեց, որ 2022 թվականի հոկտեմբերին Պրահայում նախնական պայմանավորվածությունն այն էր, որ դիտորդները պետք է լինեն սահմանի կամ շփման գծի երկու կողմերից։
«Ադրբեջանի նախագահը Ֆրանսիայի նախագահի և ԵՄ խորհրդի նախագահի ներկայությամբ համաձայնվեց, բայց հետագայում հրաժարվեց»,-հայտնեց Փաշինյանը։
Փաշինյանի խոսքով՝ Ադրբեջանը մեզ մեղադրել է ԼՂ-ում ԶՈՒ ունենալու մեջ, սակայն վերջինս նշել է, որ ԼՂ-ում բանակ չունենք, Ադրբեջանի նախագահն էլ հակառակն է պնդել։ Տեսնելով, որ բանավեճը վերջ չունի, Փաշինյանն առաջարկել է դիտորդներ բերվեն ԼՂ, Ադրբեջանը, սակայն, մերժել է։
«Միջազգային հանրությունը պետք է արձանագրի, որ, այո, շատ մեծ է նոր էսկալացիայի վտանգը և հաշվի առնելով Լաչինի միջանցքի փակ լինելը, հումանիտար ճգնաժամը, էթնիկ զտումներ իրականացնելու Ադրբեջանի ակնհայտ նախապատրաստությունները, մեր դիրքորոշումը մնում է այն, որ շատ պատեհ կլինի՝ Լաչինի միջանցք ուղղարկվի փաստահավաք առաքելություն»,-շեշտեց նա։
Մանրամասները՝ տեսանյութում։