Հաճախ ահազանգում են, թե հասեք՝ ՀՀ իշխանությունը պատրաստվում է թուղթ ստորագրել։ Այդ մասին այսօր հրավիրված ասուլիսի ընթացքում ասաց Նիկոլ Փաշինյանը՝ անդրադառնալով Արցախի ԱԺ խմբակցությունների հայտարարությանը, թե Հայաստանի իշխանությունը պարտավոր է կասկածի տակ չդնել Արցախի ժողովրդի ինքնորոշման իրավունքը։
Նրա խոսքով՝ շատ լավ նորություն կլինի, եթե լինի վիճակ, երբ մեկ-երկու օր մնա ինչ-որ թուղթ ստորագրելուն։
«Դա նշանակում է, որ բանակցային գործընթացով մենք ունեցել ենք առաջընթաց ու հասել ենք արդյունքի, որը կապահովի երկարաժամկետ խաղաղություն, կայունություն և ապահովություն։ Կա՞ արդյոք փաստաթուղթ։ Դուք գիտեք, որ փետրվարի կեսերին մենք մեր հերթական արձագանքը «խաղաղության պայմանագրի» վերաբերյալ փոխանցել ենք, և երեք օր առաջ Ադրբեջանից արձագանք ենք ստացել»,- նշեց Փաշինյանը։
Ըստ նրա՝ փաստաթղթի հարցով որոշակի առաջընթաց կա, բայց ինչքան առաջ են գնում, այդքան ի հայտ են գալիս ֆունդամենտալ խնդիրներ։
«Մենք տեսնում ենք, որ Ադրբեջանը փորձում է խաղաղության հաստատման հնարավոր պայմանագրի միջոցով ՀՀ նկատմամբ տարածքային նկրտումներ ձևակերպել, ինչը մեզ համար կարմիր գիծ է։ Այդ տեքստի ձևակերպումներով Ադրբեջանը փորձում է ԼՂ-ում ցեղասպանություն իրականացնելու մանդատ ձեռք բերել՝ այդ թվում ՀՀ ստորագրությամբ։ Սա էլ է մեզ համար կարմիր գիծ։ Բացի այդ, մենք տեսնում ենք, որ Ադրբեջանը հետապնդում է այնպիսի գիծ, որ մենք ստորագրված պայմանագրի կատարման երաշխիքների համակարգ չունենանք, ինչը ևս մեզ համար կարմիր գիծ է»,- նշեց Փաշինյանը։
Նա շեշտեց՝ Ադրբեջանն անգամ նոյեմբերի իննի հայտարարության պահանջները չի կատարում, ուստի Հայաստանն ուզում է պայմանագրի իրականացման միջազգային երաշխիքներ ունենալ։
«Մենք ասել ու ասում ենք, որ ԼՂ ժողովրդի իրավունքների ու անվտանգության հարցը մեզ համար չափազանց կարևոր է։ Եվ ճիշտ կլինի, որ այդ հարցի առաջնային հետապնդողը լինի ԼՂ ժողովուրդը։ Այս դիրքորոշման համար կան և՛ օբյեկտիվ, և՛ սուբյեկտիվ պատճառներ։ Կարծում ենք՝ հիմնական խոսակցությունը պետք է տեղի ունենա Բաքվի ու Ստեփանակերտի միջև»,- նկատեց նա։
Մանրամասները՝ տեսանյութում։