Թրամփի խորհրդականները պատրաստվում են հնարավոր իմպիչմենտի

ԱՄՆ նախագահ Դոնալդ Թրամփի խորհրդականները մշակում են ռազմավարություն նրա դեմ իմպիչմենտի փորձի դեպքում, ինչը կարող է հնարավոր լինել հաջորդ տարի, եթե դեմոկրատները վերահսկողություն ձեռք բերեն Ներկայացուցիչների պալատում, գրել է «Axios»-ը։

Ավելի վաղ ԱՄՆ դեմոկրատ կոնգրեսական Սրի Թանեդարը հայտարարել էր, որ ներկայացրել է Թրամփին իմպիչմենտի ենթարկելու բանաձև՝ յոթ մեղադրանքով, այդ թվում՝ «իշխանության բռնակալական չարաշահմամբ»։

Axios պորտալը նշել է, որ սա այս տարի Ներկայացուցիչների պալատի դեմոկրատ օրենսդիրի կողմից նախագահի կամ նրա վարչակազմի անդամի իմպիչմենտի առաջին փորձն է։ Թանեդարը դժվար թե որևէ բանի հասնի, քանի որ Կոնգրեսը հանրապետականների վերահսկողության տակ է։

Նախագահ Թրամփի խորհրդականները լրջորեն քննարկում են այն հնարավորությունը, որ նա կարող է կրկին իմպիչմենտի ենթարկվել, եթե դեմոկրատները հաջորդ տարի մեծամասնություն կազմեն Ներկայացուցիչների պալատում։

Ներկայացուցիչների պալատն այժմ հանրապետականների վերահսկողության տակ է, բայց արդեն կան ազդանշաններ, որ դեմոկրատները կարող են ցանկանալ սկսել գործընթացը։ Մասնավորապես, դա է վկայում Թանեդարի նախաձեռնությունը։

Մի կողմից, դեմոկրատները ճնշում են զգում ընտրողների կողմից՝ ավելի վճռականորեն դիմակայելու Թրամփին։ Մյուս կողմից, որոշ քաղաքական ռազմավարագետներ կարծում են, որ ավելի չափավոր դիրքորոշումը կօգնի դեմոկրատներին գրավել կենտրոնամետ տատանվող ընտրողների կողմը, ովքեր 2024 թվականին ընտրել են Թրամփին։