Քանի՞ ծնող է սեպտեմբերյան ադրբեջանական ագրեսիայից հետո որոնում իր որդուն՝ Պաշտպանության նախարարությունը, Գլխավոր Շտաբը վերջնական թիվ, անուններ չի հրապարակում։
Սեպտեմբերյան մարտերից հետո անհետ կորած ժամկետային զինծառայող Սերյոժա Ղազարյանի հայրը՝ Սերժիկ Ղազարյանը, 50 օր է հանգիստ չունի, որդուց ոչ մի լուր չկա։ ՊՆ-ից մե՛կ հերքում, մե՛կ հաստատում են՝ թշնամու կողմից զավթված հայկական հողերում դիեր կան։
«Զանգում ենք Պաշտպանության նախարարություն, մեկը ասում է՝ դիեր կա, տեսնում ենք, մյուսը ասում է՝ չկան։ Ոչ մեկ հստակ բան չի ասում, ստում են։ Եթե դի չկա, ապա ո՞ւր են մեր էրեխեքը, հարց եմ տալիս, ո՞ւր մնացին»,- MediaHub-ի հետ զրույցում հարցադրում է անում Ղազարյանը։
Գլխավոր շտաբի պետ Էդվարդ Ասրյանն էր հոկտեմբերի 31-ին ԱԺ-ում լրագրողների հետ զրույցի ժամանակ ասել, որ ադրբեջանական կողմը սեպտեմբեր 13-ի ագրեսիայից հետո մինչ օրս չի թույլատրում, որ հայկական կողմի զոհերի մարմինները դուրս բերվեն։ Նիկոլ Փաշինյանն էլ մի քանի անգամ բողոքել է՝ Ադրբեջանը խախտում է պայմանավորվածությունը և դիերը չի թողնում դուրս բերել մեր իսկ սուվերեն տարածքից, որը Բաքուն օկուպացրել է:
Հարցին, թե ճի՞շտ են լուրերը, որ կան դիեր, որոնք տեսանելի են հայկական կողմից, սակայն դրանք նույնպես դուրս բերել չեն թողնում` Ասրյանը պատասխանեց. «Փաստը կա, որ Կուտականի ուղղությամբ մենք ունենք մեկ դիակ դիտարկվող, ԱԹՍ-ով դիտարկել ենք: Դա գտնվում է հակառակորդի դիրքերի մատույցներում»:
Պատասխանատու ռազմական գերատեսչությունների՝ միմյանց հակասող հայտարարություններից ծնողներն արդեն խելագարվում են, հուսալքված ասում է Ղազարյանը։
«Քանի կար, ասում էին՝ 92 դի կա, ծնողները նայեցին դիերը՝ իրենց որդիները չէին, հետո եւս 35 դի տվեցին, էրեխեքը մեջը չէին։ Քիչ-քիչ ցուցակը մեծանում է, ի՞նչ է կատարվում, վերջապես էս երկրում պատասխանատու անձ կլինի, որ հարց լուծի։ ՊՆ-ից ասում են՝ բաներ կա, մենք չգիտենք, բայց ոնց չգիտեն։ Գնում եմ ՊՆ, ուղարկում են «Կարմիր խաչ», այնտեղից ուղարկում են Գլխավոր շտաբ, այնտեղից գնում եմ Քննչական, հետո Վարդենիս՝ ֆուտբոլի գնդա՞կ ենք, ինչ ենք։ Ծնողների համբերությունն արդեն սպառվել է։ Մեր հոգեկանը արդեն խանգարվում է, ինչքա՞ն կարելի է մարդկանց նյարդերի հետ խաղալ։ Ես դարձել եմ պոտենցիալ հանցագործ, աչքիս ոչ մի բան էլ չի գալիս, կգնամ ՊՆ-ով կխառնեմ իրար, հերիք եղավ»,-զայրույթը մի կերպ զսպելով՝ ասում է Ղազարյանը։
Պաշտոնական տվյալներով՝ սեպտեմբերի 13-ին տեղի ունեցած ռազմական գործողությունների հետևանքով հայկական կողմն ունի 207 զոհ և անհետ կորած, թշնամու սադրանքի հետևանքով եւս 3 զինծառայող զոհվել է սեպտեմբերի 18-ին։ «Մենք էրեխա ենք տվել, որ հիմա ընկնենք դիակի վրա ուրախանանք։ Ինձ ասում են՝ ի՞նչ իմաստ ունի, որ էդքան լրագրողների հետ խոսում ես։ Ինչի՞ եք հանրությունից գաղտնի պահում իրողությունները, ինչ է՝ դիերը պիտի տանենք ձեր տուն, հա՞։ Օրը գա, ձեր տուն էլ կտանենք»,-նշեց անհետ կորած զնիվորի հայրը։
Լիա Սարգսյան