Տնտեսական իրավիճակը մեր երկրում լավ է: Այս մասին կառավարության վերջին նիստին հայտարարել է վարչապետ Նիկոլ Փաշինյանը։

«2022թ. սեպտեմբերին արձանագրել ենք 14.6% տնտեսական ակտիվության ցուցանիշ: 2022թ. հունավար-սեպտեմբերին 2021թ. հունավար-սեպտեմբերի նկատմամբ աճ ունենք 14.1%»,-ասել է Փաշինյանը։

Իհարկե, Փաշինյանը թվերը չի կեղծում, այլ հանգամանք է թաքցնում: Նա չի ակնարկում անգամ, որ տնտեսական աճը կամ ակտիվությունն որևէ աղերս չունեն կառավարության գործունեության, արդյունավետ քաղաքականության հետ:

2022 թվականի ապրիլից սկսած ռուսաստանցիները գալով Հայաստան իրենց հետ բերել են բավականին լուրջ գումարներ, պաշտոնական թվերով, միայն բանկերով Հայաստան է փոխանցվել մոտ երկուսուկես միլիարդ դոլար, Ռուսաստանից տրանսֆերտները մոտ երեք անգամ ավելացել են։ 14,1 տոկոս տնտեսական աճի հիմքում հենց այս գործոնն է, որը որևէ կապ չունի կառավարության տնտեսական քաղաքականության արդյունավետության հետ:

Փոխարենը՝ տնտեսական աճը ոչ մի ազդեցություն չունի մեր հասարակության բարեկեցության հետ. մարդիկ օրեցօր ավելի աղքատանում և վատ են ապրում, իսկ պատկան մարմինները որևէ գործուն քայլ չեն ձեռնարկում՝ գնաճը կանխելու նպատակով:

Ընթացիկ տարվա առաջին ինն ամիսներին ընդհանուր գնաճը կազմել է 9,9, իսկ սննդամթերքինը` 14%:
Ի դեպ, հաջորդ տարի տնտեսական աճն ավելի զուսպ է լինելու՝ ըստ կառավարության կանխատեսումների, բայց գնաճի մակարդակը գրեթե անփոփոխ է մնալու:

Սա է Փաշինյանի հերթական «արտառոցի» հետևանքը:

Վահրամ Բագրատյան