Հակակոռուպցիոն կոմիտեի նախագահ Սասուն Խաչատրյանը կա՛մ չի տիրապետում Հակակոռուպցիոն կոմիտե-Դատախազություն պետական մարմինների աշխատանքին, կա՛մ ստում է։ Օրեր առաջ, երբ Նիկոլ Փաշինյանը Հակակոռուպցիոն կոմիտեում հայտարարեց «ահասարսուռ անուններով հրթիռների միջից, ոսկի պարունակող պլատաներ են հանել», դա հասարակությանը մոլորեցնող, բանակի սպաների պատիվը վարքաբեկող հերթական սուտն էր։
Փաշինյանը նման բովանդակությամբ հայտարարություն արել էր նաեւ 2021թ․ մայիսի 28-ին Աջափնյակ վարչական շրջանի «Քաղաքացիական պայմանագիր» կուսակցության նախընտրական շտաբում ՔՊ-ի աջակիցների հետ տեղի ունեցած հանդիպման ժամանակ։
«Ցավոք, ՀՀ-ում կան մարդիկ՝ սպա, ով Ս-300-ի վրայից պլատա ա հանում, որ տանի մեջի ոսկին ծախի՝ 30-40 հազար դրամով: Եթե էսպիսի երևույթ կա ՀՀ-ում, ամեն ինչի մեջ էլ կմեղադրեն, բայց պետք է իմանաք, որ մենք մեր երկրի նկատմամբ հարյուր տոկոսով ազնիվ ենք: Մեզ դավաճանության մեջ է մեղադրում այն կուսակցությունը, որը պետականությունը սենց թողել ա…»,- հայտարարել էր Փաշինյանը:
Նիկոլ Փաշինյանի հերթական սուտը չէր պայթի, եթե օրերս պարզ չդառնար, որ դեռեւս 2019 թվականի օգոստոսի 16-ին առանձնապես խոշոր չափերով գողություն կատարելու և պաշտոնատար անձի կողմից պաշտոնական դիրքը չարաշահելու դեպքերի առթիվ հարուցվել է քրեական գործ, մեկ անձի վերաբերյալ մեղադրական եզրակացությամբ ուղարկվել է դատարան, ապա կարճվել՝ մեղադրյալ ներգրավման ենթակա անձի հայտնի չլինելու հիմքով։
Ավելի պարզ՝ Փաշինյանի կրկնակի անգամ արված մանիպուլյատիվ հայտարարությունը իրավապահ մարմինները չեն կարողացել ապացուցել։
MediaHub-ի՝ Սասուն Խաչատրյանին ուղղված հարցին, թե ինչո՞ւ չհակադարձեցիք Փաշինյանին, երբ օրերս Հակակոռուպցիոն կոմիտեում արեց հայտարարություն, որը 2019թ․-ից ուժայինները, փաստացի, չեն կարողանում ապացուցել, վերջինս պատասխանեց․
«Դուք համոզված ե՞ք, որ նման գործ չի եղել երբեւէ։ Ես տեղյակ չեմ, դիմեք Դատախազությանը: Դուք հասկանու՞մ եք, որ ձեր հարցերի հասցեատերը ես չեմ»։
Բայց, ինչպես նշեցինք, Դատախազությունն արդեն հայտնել է, որ գործը կարճվել է, հետևապես կրկնենք հռետորական հարցը՝ Սասուն Խաչատրյանը կա՛մ չի տիրապետում Հակակոռուպցիոն կոմիտե-Դատախազություն պետական մարմինների աշխատանքին, կա՛մ ստում է։
Լիա Սարգսյան
Մանրամասն՝ տեսանյութում