Պետք է լրջորեն զբաղվել բանակով, մենք երկու տարի է՝ լսում ենք ռեֆորմների մասին, ու ծնվեց մի գաղափար, որ պետք է 24 մլն դրամով բանակից ազատել տղաներին, ինչն ուղղակի քայքայիչ է։ Այդ մասին այսօր հրավիրված ասուլիսում ասաց ՀՀ երկրորդ նախագահ Ռոբերտ Քոչարյանը։ Ըստ ՀՀ երկրորդ նախագահի՝ կան բազում քայլեր, որոնք պետք է անել։
«Ինձ համար հասկանալի չէ այն կորուստների հարաբերակցությունը, որ մենք ունեցանք։ Այդպիսի հարաբերակցություն չպետք է ունենայինք, եթե զինվորը պաշտպանված լիներ։ Ինձ համար հասկանալի չէ, թե ինչու մենք երկու տարվա ընթացքում լուրջ բնագիծ չենք կառուցել ՀՀ սահմաններում։ Միայն հենակետեր են, որոնցից մեկ-երկուսն են նորմալ կահավորել, մնացածն ամխիթար վիճակում է»,- նշեց նա։
Քոչարյանը հարց հնչեցրեց՝ եթե փող ունենք, ինչպես ասում են իշխանությունները, ապա ինչո՞ւ չենք կառուցել այնպիսի բնագիծ, որը լուրջ զսպող հանգամանք կլիներ թշնամու համար։
«Չկա բնագիծ, որը հնարավոր չէ ճեղքել, բայց բնագիծը թշնամուն լուրջ վնասներ հասցնելու համար է, ժամանակ շահելու համար է, քիչ կորուստների համար է։ Ավելի քան երեք անգամ ավել կորուստներ ունենալ պաշտպանության մեջ, նշանակում է՝ որևէ դաս չենք քաղել 44-օրյա պատերազմից։ Երկու տարի անց ինչո՞ւ մենք չունենք հարվածային ԱԹՍ-ներ, հայտարարում ենք, որ փող ունենք։ Մի՛ հավատացեք, որ հնարավոր չէ զենք գնել։ Մենք զենք գնում էինք և՛ ՌԴ-ից, և՛ Եվրոպայից, և՛ Չինաստանից, և՛ այլ տեղերից։ Սա խնդիր չէ»,- վստահեցրեց Ռոբերտ Քոչարյանը։
Նրա համոզմամբ՝ Ադրբեջանը կռիվը սկսել է ոչ թե այն պատճառով, որ ուժեղացել է, այլ այն պատճառով, որ մենք ենք շատ թուլացել։