Այսօր Ռուսաստանն ունի դաշնակցային հարաբերություններ նաև Ադրբեջանի հետ, և մտածել, որ նա կարող է ռազմական գործողություններ սկսել Ադրբեջանի դեմ, ուղղակի անհեթեթություն է։ Այդ մասին այսօր հրավիրված ասուլիսի ընթացքում ասաց ՀՀ երկրորդ նախագահ Ռոբերտ Քոչարյանը՝ անդրադառնալով հարցին, թե ովքեր են մեր դաշնակիցներն ու ումից ինչ է պետք սպասել։
Նրա խոսքով՝ լավ վիճակ է ստեղծվել հակառուսական տրամադրությունները Հայաստանում զարգացնելու համար, բայց սա այն թեման է, որի վրա հարաբերությունները կարելի է բավականաչափ լավացնել։
«Այս տեսանկյունից՝ իմ աջակիցների հետ հանդիպմանն էլ ասացի, հակառուսական տրամադրությունների պուլտն այսօր Ալիևի ձեռքում է, երբ ուզի, միացնում է․ մի քանի պոստ, երկու տասնյակ զոհ ու էլի հակառուսական տրամադրություններ»,- ասաց նա։
Սա, ըստ Քոչարյանի, նաև կապված է ռուս-ուկրաինական պատերազմի հետ։ Նախկին նախագահի դիտարկմամբ՝ բացի այդ, ակնհայտ է, որ ո՛չ ՌԴ-ն, ո՛չ ԱՄՆ-ն և ո՛չ էլ Ֆրանսիան այսօր Թուրքիայի ու Ադրբեջանի վրա ազդեցություն չունեն։
«Էրդողանի վրա ընդհանրապես ոչ ոք ազդեցություն չունի։ Ինքը մաստեր-կլաս է տալիս ազգային շահերի պաշտպանության գործում։ Անտեսելով ամեն ինչ՝ անում է այն, ինչ համարում է ճիշտ Թուրքիայի ազգային շահերի համար»,- նշեց նա։
Քոչարյանի խոսքով՝ այժմ պետք է ախտորոշել, թե այս ամենում ո՞րն է Հայաստանի ամենաթույլ տեղը։ Նա նշեց՝ իր կարծիքով՝ Սյունիքն է։
«Սա այն տարածքն է, որի նկատմամբ ամենամեծ ցանկություններն են բացահայտ արտահայտվում Թուրքիայի ու Ադրբեջանի կողմից։ Հիմա կոնկրետ հարց․ Հայաստանից բացի ո՞ւմ համար է Սյունիքը կարևոր, այո՛՝ Իրանի։ Դժվա՞ր էր գործնական քայլերի դիմել այս ուղղությամբ։ Երկու տարվա մեջ ոչինչ չարվեց։ Առնվազն երկու զորավարժություն պետք է անեինք Իրանի հետ՝ հենց Սյունիքում։ Որոշ պայմանագրային բազա պետք է լիներ Իրանի հետ այս ընթացքում, և այդ ամենը զսպող հանգամանք կլիներ Ադրբեջանի համար։ Իրանն այդ պետությունը չէ, որին մատ թափ տալով կարելի է կանգնեցնել»,- ասաց Քոչարյանը։
Նա տեղեկացրեց, որ նման խոսակցություն 2021 թվականի մայիսին Իրանի հետ եղել է, բայց հետո գործընթացը սառեցվել է Հայաստանի կողմից։ Ի դեպ, ըստ Քոչարյանի, առաջարկն էլ մեր կողմից չի եղել։
«Հիմա էլ ուշ չէ, պետք է քայլեր ձեռնարկենք։ Բայց դա չի նշանակում, որ պետք է ՀԱՊԿ-ից դուրս գանք՝ դա կլինի հերթական հիմարությունը։ Ուղղակի պետք է համալրենք մեր անվտանգային համակարգը, համոզված եմ՝ հնարավոր է դա բացատրել ռուսական կողմին։ Պետք է համարձակ լինենք»,- շեշտեց Քոչարյանը։