Մենք գտնվում ենք խորը, անվտանգային ճգնաժամի մեջ, երբ իշխանությունն ի վիճակի չէ պաշտպանել երկրի տարածքային ամբողջականությունը։ Նաև վերջին իրավիճակը ցույց տվեց, որ չենք կարողանում ներգրավել մեր գործընկերներին պայմանագրերով սահմանված պարտավորությունները կատարելու գործին։ Այս մասին այսօր հրավիրված ասուլիսի ժամանակ ասաց ՀՀ երկրորդ նախագահ Ռոբերտ Քոչարյանը։
Նրա խոսքով՝ իշխանությունը տարվել է խաղաղության դարաշրջան բացելու թեզով և այդ թեզի ներքո ուղղակի անտեսել է անվտանգային բազմաթիվ հարցեր։
«Բաքվի և Անկարայի դերն այս վերջին իրադարձությունների ներքո շեշտակի աճել է։ Թուրքիայի և Ադրբեջանի վրա ազդելու լծակները նույնպես նվազել են, չափազանց սահմանափակ են՝ ՌԴ-ի, ՀԱՊԿ-ի կողմից։ Այս ընթացքում, այս իրավիճակում անտեսել անվտանգային հարցերը, գոնե, սեփական ուժերի շրջանակներում, կարծում եմ՝ հանցավոր անգործություն է»,-ասաց նա։
ՄԱԿ-ում վարչապետի ելույթը նախագահը որակեց որպես խաղաղության դարաշրջանի հոգեհանգստի ելույթ և վերջինիս խոսքով՝ նույն բառապաշարով այստեղ խոսելն անիմաստ է։
«Պանիխիդայի ժամանակ հանգուցյալին ոչ ոք առողջություն չի ցանկանում, ուղղակի պետք է այդ էջը փակել և բացել նոր էջ՝ այլ հիմքերով»։
Նախագահը նկատեց, որ մեր դերակատարությունը տարածաշրջանում շեշտակի նվազել է։
«Եթե ավելի կոպիտ լինենք՝ հասել է «պլինտուսի» մակարդակին»,-ասաց նա և հավելեց, որ ՀՀ-ում իրավիճակը պայթյունավտանգ է։