Աղավնոյում խնդիրները շատ են, ցավոք, լուծումներ չեն տրվում։ Այս մասին MediaHub.am-ի հետ զրույցում ասաց Քաշաթաղի շրջանի Աղավնո համայնքի ղեկավար Անդրանիկ Չավուշյանը։
«Անվտանգության հարցը մեզ համար նոր չէ, նույնիսկ սովորել ենք, սակայն, կան բազմաթիվ խնդիրներ, որոնք ունեն հրատապ լուծման անհրաժեշտություն, բայց դրանք մատնված են անտարբերության, ինչը ցավալի է»,- ասաց Չավուշյանը՝ մատնանշելով դրանցից մի քանիսը․
«Կառավարության հետ խոսել ենք ջրի խնդրի մասին, մենք ունեինք արտիզանի ծրագիր, ջրի ակունքի հարցը։ Սակայն, մենք ունենք պետություն, եթե պետությունը պատրաստ չէ այդ կոպեկները տրամադրել խնդիրը լուծելու համար, միգուցե ցանկություն չկա պարզապես, չգիտեմ, կամ էլ իշխանությունների տրամադրությունները միայն Աղավնոն հանձնելու մասին է։
Իրենք չեն անում, մենք ենք մեր անձնական միջոցներով անում՝ բարերարների, այլ սրտացավ մարդկանց միջոցներով»,-նշեց Չավուշյանը՝ մանրամասներով․
«Նման կերպ մենք վերանորոգել ենք գյուղի դպրոցը, բուժկետը, գյուղապետարանի տանիքը և այլն։ Սակայն պետությունը որևէ աջակցություն չի տրամադրել, նույնիսկ հակառակն է եղել տրամադրվածությունը»։
Չավուշյանի խոսքով՝ երբ պատերազմից հետո դպրոցը վերաբացեցինք, վերանորոգեցինք, բնակչությունը հետ եկավ Աղավնո։
«Գյուղի խնդիրները ստանում են քաղաքական էֆեկտ, սակայն ակնհայտ է, որ իշխանությունները չեն ուզում ոչ մի կոպեկ ծախսել գյուղի խնդիրները հոգալու համար, իսկ այդ խնդիրները շատ են։
Ամենակարևորներից մեկն էլ փողոցների լուսավորության խնդիրն է, արդեն մի քանիսը գնել ենք, որ արևի ճառագայթներով լուասվորություն հաղորդեն գյուղին, այժմ այդ աշխատանքներով ենք զբաղված, որպեսզի առանց հոսանքի կարողանանք ինչ որ չափով լուսավորություն ստանալ։ Գազամատակարարում ևս չունի Աղավնոն և հետաքրքիրն այն է, որ Արցախ գազամատակարարումն անցնում է Աղավնոյի ճանապարհով, սակայն մի կիլոմետր է հարկավոր, որ դա հասնի գյուղ, բայց չեն անում, խնդիրն ամենևին խողովակը չէ, այլ պետական տրամադրվածությունները։ Միգուցե ներքին պայմանավորվածություննե՞ր կան, որ մենք չգիտենք։ Սա պետական այրերի հստակ ծրագիրն է՝ հայաթափման ծրագիր, ուրիշ ոչինչ»,- հավելեց Չավուշյանը։
Մերի Գևորգյան