Այսօր Շիրակի մարզի Ղարիբջանյան և Գետք գյուղերի բնակիչները փակել էին Գյումրի–Արմավիր ճանապարհը։ Նրանք պահանջում էին լուծել ոռոգման ջրի հարցը։ Մարզպետարանի գյուղատնտեսության վարչության պետ Ռոման Հմայակյանի ու Ախուրյանի համայնքապետի տեղակալ Վարդան Իկիլիկյանի հետ բանակցելուց հետո գյուղացիները որոշել են բացել ճանապարհը, սակայն խնդրին լուծում այդպես էլ չի տրվել։ Ախուրյանի համայնքապետի տեղակալ Վարդան Իկիլիկյանը MediaHub.am-ի հետ զրույցում նշեց, որ իրականում խնդիրը միայն նշված համայնքներում չէ, ամբողջ տարածքում է նույն խնդիրը։
«Ղարիբջանյանում ջրի քանակությունը պակասել է, կոյուղաջրով են ոռոգում իրականացնում։ Մոտ 100 տնտեսություն Ղարիբջանյան համայնքում է տուժում, մոտ 50-ը՝ Գետքում, Բայանդուրից, Ազատանից, Բենիամինից, Այգաբացից ևս նույն խնդրով են դիմում։ Հերթով դուրս կգան, ճանապարհ կփակեն, բայց հարցին օպերատիվ լուծում չկա։ 60 մլն խորանարդ մետր ջուր կա Արփի լճում, բայց բերելու հնարավորություն չեն ստեղծում, եկածն էլ բոլոր համայնքներին չի բավարարում։ Նախկինում Ախուրյան ջրամբարից հնարավոր էր բերել, հիմա խողովակներն են հին, լույսն է թանկ, բայց փորձում ենք գնին այլևս չնայել, ծրագիր ենք փորձում իրականացնել, որպեսզի կրկին որոշ չափով ջուր վերցնենք Ախուրյանից»,-ընդգծեց նա։
Հարցին, թե Կառավարություն դիմե՞լ են, թե ոչ, վերջինս պատասխանեց՝ ամեն տարի դիմում են ու ոչ մի արդյունք չկա։
«Ժողովուրդն ընդամենը ջուր է ուզում, որ բարիք արտադրի, պարենով ապահովի մեր երկրին։ Կառավարությունը որ լուծում տար, Ղարիբջանյանը ինքնահոսով չէր ջրի բերքը։ Ճանապարհն այսօր բացեցինք, բայց ի՞նչ օգուտ, պետական աջակցություն է պետք, միջոցներ են պետք, որ մարդկանց ապրուստը չփչանա, գյուղացիները վարկերի տակ են, միլիոններ են ներդրել ու ոչինչ չկա»։
Ախուրյանի համայնքապետի տեղակալի խոսքով՝ ժողովրդի ճակատագիրը չի հետաքրքրում պետությանը։
«Նորից ենք Կառավարություն դիմել, բայց չի հետաքրքրում իրենց, քանի տարի է՝ խոսում-խոսում ենք։ Անցած տարի ամեն քայլի դիմել ենք ու հարցի լուծում չկա, հիմա ի՞նչ խղճով քնենք, երբ գյուղացիների դաշտերը աչքներիս առաջ չորանում են»։
Լիաննա Թորոսյան