Հիվանդություն, որը մեծացնում է դեմենցիայի վտանգը
Եթե միջին տարիքում արյան բարձր ճնշումը չբուժվի, ապա մեծանում է ծերության ժամանակ դեմենցիայի զարգացման ռիսկը, ասել է պրոֆեսոր, բժիշկ-խորհրդատու Ռոբ Գալոուեյը «Daily Mail»-ին:
Մասնագետը պատմել է, որ անձամբ ականատես է եղել, թե ինչպես հաջողակ, խելացի և լիովին առողջ մարդիկ ընդամենը մի քանի տարում ուղեղի անդառնալի փոփոխությունների պատճառով բառացիորեն կորցրել են իրենց նկատմամբ վերահսկողությունը։
«Մենք երկար տարիներ գիտենք, որ արյան բարձր ճնշումը վնասակար է առողջության համար: Այն մեծացնում է սրտի կաթվածի, ինսուլտի և երիկամների անբավարարության վտանգը: Այժմ ավելի ու ավելի պարզ է դառնում, որ այս սովորական վիճակը նաև դեմենցիայի հիմնական պատճառն է, հատկապես, եթե չբուժվի միջին տարիքում», - ասել է Գալոուեյը:
Բժիշկը նշել է, որ իր անձնական դիտարկումները հաստատում են որոշ գիտական հետազոտություններ։ Այսպես, նրա խոսքով՝ 2023 թվականին մի խումբ գիտնականներ հայտնաբերել են, որ հիպերտոնիկ հիվանդների մոտ 42 տոկոսով բարձր է դեմենցիայի վտանգը։ Պրոֆեսորի կողմից վկայակոչված մեկ այլ հետազոտություն ցույց է տվել, որ երիտասարդության շրջանում 120/80 նորմայից բարձր արյան ճնշումը կապված է ուղեղի վաղ ծերացման հետ:
Գալոուեյն ասել է, որ վերջին գիտական ապացույցները ցույց են տվել, որ դեմենցիայի ռիսկն ավելի բարձր է նույնիսկ նվազագույն աճի դեպքում, օրինակ՝ 140, ուստի նա բժիշկներին և հիվանդներին հորդորել է չանտեսել վիճակը: «Ինչպես կառավարում եք արյան ճնշումը և ուղեղի առողջությունը 40-ից 60 տարեկանում, որոշում է ձեր կյանքի որակը հետագա տարիներին»,- ընդգծել է բժիշկը:
