Մարդկանց թիվը, ովքեր ստիպված են եղել աշխատել կամ ամուսնացած են իրենց կամքին հակառակ, վերջին տարիներին շուրջ 50 միլիոնի է հասել, հայտարարել է ՄԱԿ-ի Աշխատանքի միջազգային կազմակերպությունը (ԱՄԿ)՝ ժամանակակից ստրկության մասին իր զեկույցի հրապարակումից հետո:

Ճգնաժամերը, ինչպիսիք են COVID-19 համավարակը, զինված հակամարտությունը եւ կլիմայի փոփոխությունը, աննախադեպ խափանում են ստեղծել զբաղվածության եւ կրթության ոլորտում՝ խորացնելով ծայրահեղ աղքատությունը և հարկադիր միգրացիան: 2016-ի վերջին հաշվարկի համեմատ՝ ժամանակակից ստրկության մեջ գտնվող մարդկանց թիվն աճել է մոտ 9.3 միլիոնով։

Ըստ վերջին տվյալների՝ 2021 թ. հարկադիր աշխատանքին բաժին է ընկել ժամանակակից ստրկության մեջ գտնվող 27.6 միլիոն մարդ, որից ավելի քան 3.3 միլիոնը երեխաներ են, իսկ հարկադիր ամուսնությանը բաժին է ընկել 22 միլիոն մարդ։

ԱՄԿ-ն պարզել է, որ հարկադիր աշխատանքի բոլոր դեպքերի կեսից ավելին տեղի է ունենում միջինից բարձր կամ բարձր եկամուտ ունեցող երկրներում, որտեղ աշխատանքային միգրանտներն ավելի քան երեք անգամ ավելի շատ կտուժեն:

Զեկույցում նշվում է Կատարը, որը նոյեմբերին մեկնարկող ՖԻՖԱ-ի Աշխարհի գավաթի խաղարկությունից առաջ այնտեղ աշխատող միգրանտների աշխատանքային իրավունքների խախտման մեջ տարածված մեղադրանքների է բախվել:

Սակայն 2018-ի ապրիլին մայրաքաղաք Դոհայում ԱՄԿ-ի գրասենյակ բացելուց հետո երկրի հարյուր հազարավոր աշխատանքային միգրանտների կենսապայմանների եւ աշխատանքային պայմանների առումով «զգալի առաջընթաց» է նկատվել՝ նույնիսկ չնայած աշխատանքային նոր կանոնների կիրառման հետ կապված խնդիրներին, ասվում է զեկույցում։

ԱՄԿ-ի զեկույցում նշվում են մտահոգությունները նաեւ Չինաստանի որոշ հատվածներում հարկադիր աշխատանքի կապակցությամբ։