Միանշանակ բողոքարկելու ենք դատարանի որոշումը։ Այս մասին այսօր MediaHub-ի հետ զրույցում ասաց Զանգեզուրի պղնձամոլիբդենային կոմբինատի սպանված պահնորդ Հայրապետ Մելիքսեթյանի որդին՝ Ժորժ Մելիքսեթյանը՝ խոսելով հորը սպանած ադրբեջանցի զինծառայող Հուսեյն Ախունդովին 20 տարվա ազատազրկման դատապարտելու որոշման մասին։
«Սա, բնականաբար, մեզ համար բավարար չէ։ Այս ամենից հետո 20 տարի ազատազրկումը բացարձակ ճիշտ չէ։ Մենք սպասում էինք, որ ցմահ ազատազրկման կդադապարտեն։ Պատկերացրեք՝ այստեղ նման դեպք ինձ հետ լիներ, ինձ 20 տարով կդատապարտեին, ու նույն իրավիճակում, երբ թուրքն է գալիս, սահման հատում, խաղաղ բնակչի սպանում ու իրեն էլ են 20 տարի տալիս։ Մենք հիմա փորձում ենք աշխատել որոշումը բողոքարկելու ուղղությամբ»,-ասաց Ժորժ Մելիքսեթյանը։
Դիտարկմանը, որ կարծես Բաքուն մտադրություն ունի փոխանակել իր զինծառայողներին մայիսին Սյունիքից առևանգված երկու հայ զինծառայողների հետ և հարցին՝ եթե Հայաստանը գնա այս որոշմանը, ինչպես կարձագանքի Մելիքսեթյանի ընտանիքը, որդին պատասխանեց․
«Որքանով տեղյակ եմ՝ իմ համաձայնությունն է պետք։ Այս պահին այն կարծիքին եմ, որ չեմ համաձայնի. այս ամենից հետո, միանշանակ այլ տարբերակի մասին չեմ մտածում»,-նշեց նա։
Հիշեցնենք, որ ապրիլի 10-ին երկու ադրբեջանցի զինծառայողներ հատել էին Հայաստանի պետական սահմանը: Նրանցից մեկը՝ Ագշին Գաբիլի Բաբիրովը, հայտնաբերվել էր Սյունիքի մարզի Աշոտավան համայնքում, որը նշել էր, թե ընկերոջ հետ փախել են իրենց ծառայակիցներից։ Երկրորդ ադրբեջանցին՝ Հուսեյն Ահլիմանի Ախունդովն ավելի ուշ հայտաբերվեց. 3 օր անց Սյունիքի մարզի Աճանան գյուղում գյուղացիները տարօրինակ մեկին էին նկատել, մոտեցել, պարզել, որ ադրբեջանցի է: Ախունդովին գտնելուց հետո առաջ բերվեց մի վարկած, թե ինքն է սպանել ԶՊՄԿ-ի պահնորդին, քանի որ Հայրապետի հեռախոսը վերջինիս մոտ է եղել։
Դատախազությունն ապրիլի 18-ին մեղադրանք առաջադրեց Հուսեյն Ախունդովին նաեւ պահնորդի սպանության համար։ Գերատեսչության փոխանցմամբ՝ ադրբեջանցին իր մոտ ապօրինի պահվող ինքնաձիգից կրակոցներ է արձակել պահնորդի ուղղությամբ, որը մահացել էր: Այնուհետեւ, Հուսեյն Ախունդովը վերցրել է նրա հեռախոսը, ծխախոտն ու կրակայրիչը, փորձել գործարկել կայանված մեքենայի շարժիչը, սակայն չկարողանալով, դիմել է փախուստի: Ախունդովն այդ հեռախոսով նկարահանել է նաև տեսաուղերձ այն մասին, որ սպանել է հայի:
Ի դեպ, Ադրբեջանում ՀՀ սուվերեն տարածքից առևանգված 2 հայ զինծառայողների գործով նախնական դատական նիստը նշանակվել է հուլիսի 3-ին։
Լիաննա Թորոսյան