Մամուլը գրել էր, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը, ամենայն հավանականությամբ, Արարատյան հայրապետական թեմի առաջնորդ, արքեպիսկոպոս Նավասարդ (Սամվել) Կճոյանի գույքի հարցով դիմում կներկայացնի դատարան։
Ըստ մամուլի՝ Կճոյանին պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր, ավելին՝ Նավասարդ Կճոյանի գույքն արգելանքի տակ է դրվել: Բանն այն է, որ իրավապահները հարց են բարձրացրել՝ որտեղից հոգեւորականը, որը չի ունեցել եկամուտ, ունի մեծ ծավալների գույք: Հոգեւորականը բացատրել է, որ դա նա՝ որպես հոգեւորական, ստացել է նվիրատվություն, իսկ, ահա, իրավապահները հոգեւորականին բացատրել են, որ եկեղեցին ասում է՝ այդ նվիրատվությունն իրենը չէ, եկեղեցունն է:
MediaHub-ի հետ զրույցում Կճոյանը նշեց, որ սա նոր բան չէ և այն, ինչ պետք է իրավապահ մարմիններին, իրենք արդեն տրամադրել են։
«Իրենք թող որոշեն, թե ինչ են անելու։ Ես ոչնչից չեմ վախենում։ Եթե պետք է վախենաս, ավելի լավ է չապրես, պետք է Աստծուց վախենալ, ուրիշ ոչ մեկից»,-ասաց նա։
Ապա հավելեց՝ ահռելի ունեցվածք ասվածը չգիտի, թե ով, ինչպես է հասկանում։
Լիաննա Թորոսյան