Ֆրանսիայի նախագահ Էմանուել Մակրոնը շաբաթ օրը Ալժիրի երկրորդ քաղաք Օրանում հանդիպում է ունեցել մարզիկների եւ արտիստների հետ, որից հետո նա իր այցը կավարտի «նոր դաշնագրով», որի նպատակն է վերականգնել կապերը նախկին ֆրանսիական գաղութի հետ, հաղորդում է AFP-ն։
Եռօրյա այցի նպատակն է շրջել հյուսիսաֆրիկյան ազգի հետ բազմամսյա լարվածության էջը, որը այս տարվա սկզբին տոնել է անկախության 60-ամյակը՝ 132 տարվա ֆրանսիական տիրապետությունից հետո:
Դա տեղի է ունենում նաեւ այն ժամանակ, երբ եվրոպական տերությունները փորձում են փոխարինել ռուսական էներգակիրների ներմուծումը, այդ թվում՝ Աֆրիկայի ամենամեծ գազ արտահանող Ալժիրից մատակարարումներով, որն իր հերթին ձգտում է ավելի ակտիվ դեր խաղալ տարածաշրջանում:
Մակրոնը նախքան երիտասարդների եւ մարզիկների հետ հանդիպելը կայցելի բլրի գագաթին գտնվող մատուռ եւ խորհրդանշական երաժշտական խանութ Օրանում՝ Rai-ի երաժշտության հոգեւոր հայրենիքում, եւ կդիտի բրեյք պարողների ելույթը:
Ավելի ուշ նա եւ նրա ալժիրցի գործընկեր Աբդելմաջիդ Տեբունը կստորագրեն «համատեղ հռչակագիր՝ կոնկրետ եւ հավակնոտ գործընկերությունը վերականգնելու մասին», ասվում է Ֆրանսիայի նախագահի գրասենյակի հայտարարության մեջ:
Ուրբաթ երեկոյան Մակրոնն ընթրել է ալժիրցի գրող Քամել Դաուդի եւ Օրանի այլ գործիչների հետ։
Նա նաեւ հայտարարել է, որ այս տարի եւս 8000 ալժիրցի ուսանողների կընդունեն Ֆրանսիայում սովորելու, բացի երկրում արդեն սովորող 30 000-ից։
Հինգշաբթի օրը Թեբունի հետ հանդիպումից եւ գաղութատիրական շրջանը ու դրան վերջ դրած ավերիչ ութամյա պատերազմն ուսումնասիրող պատմաբանների համատեղ հանձնաժողովի ձեւավորման մասին հայտարարությունից հետո Մակրոնը հայտարարել է հարաբերություններում «նոր էջի» մասին։
Սակայն Ֆրանսիայում ինչպեսե ձախ, այնպես էլ աջ քաղաքական գործիչներին վրդովեցրել է այդ առաջարկը։
Սոցիալիստական կուսակցության առաջնորդ Օլիվյե Ֆորը նշել է, որ Մակրոնը 2017 թվականին ֆրանսիական գաղութատիրությունն անվանել է «հանցագործություն մարդկության դեմ», իսկ հետո կասկածի տակ է դրել Ալժիրի՝ որպես պետության գոյությունը մինչեւ գաղութատիրության շրջանը։
Մակրոնի այցը համընդհանուր հավանության չի արժանացել նաեւ ալժիրցիների շրջանում։
«Պատմությունը չի կարող գրվել ստի օգնությամբ... օրինակ, որ Ալժիրը ստեղծվել է Ֆրանսիայի կողմից»,- ասվում է ֆրանսալեզու Le Soir թերթի խմբագրականում։
«Մենք ակնկալում էինք, որ Մակրոնն այս այցի ընթացքում ջնջեր այս կոպիտ կեղծիքը»,- ասվում է հոդվածում, որը քննադատում է նրան՝ «իր թերություններն ու իր երկրի թերությունները ճանաչելու քաջություն չունենալու համար»: