Իսրայելի վարչապետ Յաիր Լապիդը ծրագրում է մոտ ապագայում անվտանգության հարցերով խորհրդակցություն հրավիրել ընդդիմության առաջնորդ Բենիամին Նեթանյահուի հետ։ Այս մասին շաբաթ օրը հայտնել է Yedioth Ahronoth թերթը։
Հրատարակության համաձայն՝ Լապիդը ցանկանում է Նեթանյահուին հրավիրել ճեպազրույցի՝ կապված Թեհրանի և միջազգային հանրության միջև Գործողությունների համատեղ համապարփակ ծրագրի (JCPOA) վերականգնման շուրջ բանակցությունների հետ։
Եթե անվտանգության պլանավորված հանդիպումը կայանա, դա կլինի Լապիդի և Նեթանյահուի երկրորդ հանդիպումը այս ձևաչափով, նշում է Yedioth Ahronoth-ը։ Ավելի վաղ վարչապետը Նեթանյահուի հետ նման հանդիպում էր անցկացրել օգոստոսի սկզբին, երբ նա ընդդիմության առաջնորդին տեղեկացրել էր «Արշալույս» ռազմական գործողության ընթացքի մասին, որը Իսրայելի պաշտպանության ուժերն անցկացրել են օգոստոսի 5-ից 7-ը Գազայի հատվածում։ Արդյունքում Նեթանյահուն, ով զբաղեցրել է վարչապետի պաշտոնը 2009-ից 2021 թվականներին, լրագրողներին ասել է, որ պաշտպանում է ներկայիս կաբինետի գործողությունները՝ կապված պաղեստինյան անկլավի հետ։
Ինչպես նշել է իսրայելական 12-րդ հեռուստաալիքը, Նեթանյահուն այնուհետև առաջին անգամ համաձայնել է մասնակցել Լապիդի կողմից անցկացվող անվտանգության ճեպազրույցին։ Թեև խորհրդարանական ընդդիմության առաջնորդի պաշտոնը նրան պարտավորեցնում է կանոնավոր կերպով ներկա գտնվել վարչապետի հետ անվտանգության հանդիպումներին, սակայն մինչ այժմ նա հրաժարվել է մասնակցել դրանց, նշել է հեռուստաալիքը: