Կրոկուսի ահաբեկչության հետքերը տանում են դեպի ուկրաինական հատուկ ծառայություններ․ Պատրուշև

Մերձմոսկովյան «Կրոկուս Սիթի Հոլլ» համերգասրահում տեղի ունեցած ահաբեկչության հետքերը տանում են դեպի ուկրաինական հատուկ ծառայություններ։ 

Հայտարարել է Ռուսաստանի Անվտանգության խորհրդի քարտուղար Նիկոլայ Պատրուշևը։

Ըստ նրա՝ ահաբեկչության հետևում կանգնած է Միացյալ Նահանգները, որը «վերահսկում է Ուկրաինայի իշխանությունները և ստեղծել է Ռուսաստանում արգելված և ահաբեկչական ճանաչված «Իսլամական պետությունը»»։

«Նրանք փորձում են մեզ պարտադրել, որ ահաբեկչությունն իրականացրել է ոչ թե Կիևի ռեժիմը, այլ արմատական ​​իսլամական գաղափարախոսության կողմնակիցները, հավանաբար ԴԱԻՇ-ի աֆղանական ճյուղի անդամներ», - ասել է Պատրուշևն Աստանայում Շանհայի համագործակցության կազմակերպության Անվտանգության խորհուրդների քարտուղարների 19-րդ տարեկան հանդիպման ժամանակ.

«Սակայն շատ ավելի կարևոր է արագ պարզել, թե ով է այս զազրելի հանցագործության պատվիրատուն ու հովանավորը: Հետքերը տանում են դեպի ուկրաինական հատուկ ծառայություններ։ Բայց բոլորը լավ գիտեն, որ Կիևի ռեժիմն անկախ չէ և ամբողջությամբ վերահսկվում է ԱՄՆ-ի կողմից։ Պետք է նաև հաշվի առնել, որ ԴԱԻՇ-ը, Ալ-Քաիդան և այլ ահաբեկչական կազմակերպություններ ստեղծվել են Վաշինգտոնի կողմից»,- հավելել է ՌԴ ԱԽ քարտուղարը։

Նիկոլայ Պատրուշևը նաև նշել է, որ ահաբեկչությունն իրականացրած անձինք բերման են ենթարկվել Ռուսաստանի սահմանին մոտենալու փորձի ժամանակ, որտեղ, ըստ նրա, ուկրաինական կողմից անցման պատուհան է պատրաստվել։

 Նրա կարծիքով՝ հատկանշական է, որ ահաբեկչությունից անմիջապես հետո Միացյալ Նահանգները սկսել է «ակտիվորեն առաջ տանել Ուկրաինայի չներգրավվածության թեզը»։

Crocus City Hall-ում ահաբեկչությունը տեղի է ունեցել մարտի 22-ի երեկոյան՝ Picnic խմբի համերգի մեկնարկից քիչ առաջ։ Զոհվել է 144 մարդ, վիրավորվել՝ համալիրի 551 այցելու։ Հարձակման պատասխանատվությունը ստանձնել է «Իսլամական պետությունը»: Ամերիկյան հետախուզական ծառայությունները հայտնել են խմբավորման ներգրավվածության մասին։ Նախագահ Վլադիմիր Պուտինը հայտարարել է, որ ահաբեկչությունն իրականացրել են արմատական ​​իսլամիստները։ Միաժամանակ ՌԴ անվտանգության դաշնային ծառայության ղեկավար Ալեքսանդր Բորտնիկովը խոստովանել է, որ ահաբեկչությանը կարող են ներգրավված լինել ԱՄՆ-ը, Մեծ Բրիտանիան և Ուկրաինան։ Վերջինները հերքել են իրենց ներգրավվածությունը։