«Հայաստան» խմբակցությունում վստա՞հ են, որ Գեղամ Նազարյանը լիարժեք ընդդիմադիր է և անվստահություն կհայտնի Փաշինյանին 

Ի՞նչ է մտածում ընդդիմությունը Բագրատ Սրբազանի հայտարարած իմպիչմենթի գործընթացի մասին, այս շարժման տրամաբանական հանգուցալուծումը, ի վերջո, ինչպե՞ս են պատկերացնում՝ իմպիչմենթո՞վ, թե՞ ոչ իմպիչմենթով։

MediaHub-ն այսօր այս հարցի շուրջ հետաքրքրվեց ԱԺ «Հայաստան» խմբակցության քարտուղար Արծվիկ Մինասյանից։

«Բոլոր հնարավոր միջոցներով։ Բայց իմփիչմենթի համար նվազագույն անհրաժեշտությունը դեռ պահպանվում է, որ պիտի ստեղծեն։ Այսինքն՝ իմպիչմենթը պիտի հաջողություն ունենա, ոչ թե ձևի համար լինի, որ մտնես՝ չստացվի կամ փորձես մտնել՝ չստացվի»,- ասաց Մինասյանը։

-Բագրատ Սրբազանն ասաց, որ իմպիչմենթի մասին հայտարարելուց առաջ ինքն այդ հարցը ձեզ հետ չէր քննարկել, և ընդդիմության համար դա անակնկալ է եղել։ Այդպե՞ս է, իրո՞ք անկնկալ էր ձեզ համար։

-Ես չգիտեմ՝ ինչ է ասել Բագրատ Սրբազանը, չեմ էլ լսել, որ այդպիսի հայտարարություն է արել, հակառակը՝ ինքն ասաց, որ քննարկումը եղել է, երկու խմբակցություններն էլ համաձայն են։

-Ես ժուռնալիստների միություն կատարած այցի ժամանակ իրեն հարցրի՝ արդյոք անակնկա՞լ է եղել ընդդիմադիր խմբակցությունների համար, երբ ինքը մայիսի 9-ին հարթակից հայտարարեց, որ իմպիչմենթի գործըթնաց է սկսելու, նա չհերքեց, որ անակնկալ է եղել։

-Տեղյակ չեմ՝ ինքն ինչ է ասել, ես ասում եմ այն, ինչ ինքը հայտարարել է։

-Լավ, հիմա ես Ձեզ եմ հարցնում՝ դուք տեղյա՞կ էիք, որ Սրբազանը մայիսի 9-ի հանրահավաքի ժամանակ պետք է հայտարարի իմպիչմենթի մասին, թե՞ հայտարարել է, հետո է ձեզ հետ քննարկել։

-Ես էդ օրը, որ այստեղ չեմ եղել, ես դրսից հետևեցի, տեսա, որ հավաք էր հրավիրվել երկու ընդդիմադիր խմբակցությունների պատգամավորների հետ, հավանաբար հենց էդ պահին էլ քննարկում է եղել։

-Բայց ինքն ավելի վաղ էր հայտարարել իմպիչմենթի մասին։

-Դե դա չեմ կարծում, թե էական է՝ շո՞ւտ է հայտարարել, թե՞ ուշ է հայտարարել։ Իմպիչմենթ բառն էլ էստեղ էդքան ճիշտ չի, դա անվստահության հարց է, որը տևական ժամանակ է՝ քննարկվում է, դա նորություն չէ։

-Դուք Սրբազանին ներկայացրե՞լ եք այդ հնարավորությունը, որ պետք է այդ փամփուշտը ճիշտ օգտագործել, և ինքնանպատակ չդառնա այդ գործընթացը սկսելը։

-Անվստահության հարցը միշտ, բոլոր ժամանակներում եղել է, քննարկվել է բոլորի հետ։ Դա գործիք է, դա միջոց է, որը պիտի հաջողություն ունենա անհրաժեշտ միջավայրը ստեղծելու պայմաններում։ Ոչ թե ձևական քայլ անես, այլ ըստ էության քայլն անես։ Դա նշանակում է նաև, որ իշխող մեծամասնության մեջ պիտի լինի էդ պատրաստակամությունը՝ կլինի դա պարտադրանքով, համոզմունքով, թե սեփական կամքով, որ անհրաժեշտ է այդ գործիքն օգտագործել, որովհետև դա հնարավորություն է՝ կանգնեցնելու այս կործանման ընթացքը։

-Իսկ ընդդիմության մասով էդ պատրաստակամությունն ամբողջությամբ կա՞, որ առնվազն ստորագրեն և մտցնեն հարցն օրակարգ։ Դուք վստա՞հ եք, որ «Հայաստան» խմբակցությունում, օրինակ, բոլորը կստորագրեն դրա տակ։

-Ես որևէ այլ բան մտածելու հիմքեր չունեմ։

-Այսինքն՝ ձեր խմբակցության բոլոր անդամների հետ այդ հարցով քննարկում ունեցե՞լ եք, իրենք վստահեցրե՞լ են, որ անհատապես բոլորը կստորագրեն և կքվեարկեն։

-Այդ հարցն արդեն, գիտե՞ք, քանի տարի է քննարկվել, որ ընդդիմադիր ամենախոշոր խմբակցությունը որևէ խնդիր չունի էդ հարցով։ Գլխավոր հարցը, որ այս ուժը՝ Նիկոլ Փաշինյանի գլխավորությամբ, պիտի զիջի իշխանությունը, դրանում որևէ կասկած չկա։ Եւ մենք հայտնել ենք մեր պատրաստակամությունը, որ անհրաժեշտ միջավայրի ձևավորման պայմաններում, իհարկե, որևէ հարց չկա։ 

-Մի փոքր, բայց էլի գլխավոր հարց էլ կա այս պարագայում՝ վստահություն ունե՞ք, որ անկախ պատգամավոր Իշխան Զաքարյանը կմիանա Փաշինյանին անվստահություն հայտնելու գործընթացին։

-Այդ հարցին ես չեմ կարող պատասխանել, որովհետև Իշխան Զաքարյանի հետ ես որևէ կոնտակտ անձամբ չեմ ունեցել։ Բայց ես վստահում եմ Բագրատ Սրբազանի խոսքերին․ ժամանակը ցույց կտա։

-Ի դեպ, երեկ Գեղամ Նազարյանի մասնակցությամբ այդ միջադեպից հետո խորացան կասկածները, թե արդյոք Գեղամ Նազարյանը կմիանա՞ այդ գործընթացին, չնայած՝ ձեր խմբակցությունից այլ անուններ էլ են շրջանառվում, որ հնարավոր է՝ նրանք ևս չմիանան Փաշինյանին իմփիչմենթի ենթարկելու գործընթացին։

-Ես չգիտեմ՝ ով ինչ անուններ է տարածում, բայց այն, ինչ երեկ եղել է Գեղամ Նազարյանի մասնակցությամբ՝ էմոցիոնալ այդ ֆոնը որևէ կապ չունի խմբակցության դիրքորոշման հետ, դա պետք է դիտարկել բացառապես անձնական և էմոցիոնալ տիրույթում։ Ես նաև իմ անունից եմ ուզում ներողություն խնդրել լրագրող Անի Գևորգյանից, նման գնահատական, բնականաբար, չի կարող հնչել խմբակցության կողմից իր հասցեին։ Եւ մի կարևոր բան էլ՝ չի կարելի նաև էմոցիոնալ ֆոնը վերածել քաղաքական դիրքորոշման մի ամբողջ խմբակցության մասով։

-Պարզապես, այդ պահվածքից հետո մարդկանց մոտ հարցեր առաջացան, թե արդյոք Գեղամ Նազարյանը լիարժեք ընդդիմադիր դաշտում է գործում, և վաղը, որ Նիկոլ Փաշինյանին անվստահություն հայտնելու գործընթաց սկսեք, ինքը կմիանա՞ դրան, թե՞ կարող է ինչ-ինչ պատճառաբանությամբ չստորագրի դրա տակ։

-Ես այլ հիմքեր չունեմ՝ պնդելու էդ վերջին հաստատման մասով և չեմ կարծում, որ էդպիսի իրավիճակ կարող է առաջանալ։

Վահե Մակարյան