ՀՀ Շրջակա միջավայրի նախարարության հասարակայնության հետ կապերի բաժինը հանդես է եկել հայտարարությամբ՝ հորդորելով քաղաքական ենթատեքստ չփնտրել նոյեմբերի 5-ին անցկացվելիք համապետական ծառատունկի և ընդդիմության սպասվող հանրահավաքի միջև։
Ըստ տարածված հայտարարության՝ ծառատունկի մասին հայտարարվել էր հոկտեմբերի 28-ին։
MediaHub-ը, սակայն, ո՛չ նախարարության կայքում, ոչ էլ ֆեյսբուքյան էջում, այս հայտարարությունը հավաստող որևէ հրապարակում չգտավ։ Ասել է թե՝ նախարարությունը գուցեև որոշել էր, ինչպես իրենք են արդարանում, հենց վաղը համապետական ծառատունկ անցկացնել, բայց մոռացել էր տեղեկացնել այդ մասին հանրությանը: Տեղեկացնելու տարբերակներից հիմնականներում՝ պաշտոնական կայքում ու ՖԲ էջում, կրկնենք, ծառատունկի մասին որևէ հիշատակում մինչև երեկ չկա:
«Համապետական ծառատունկի օրը հայտարարվել է սույն թվականի հոկտեմբերի 28-ին, իսկ նոյեմբերի 5-ին նախատեսվող հանրահավաքի մասին հայտարարվել է 2 օր անց՝ հոկտեմբերի 30-ն»,- ասված է հայտարարության մեջ։
Ուստի, շարունակում են նախարարությունից, «հորդորում ենք զերծ մնալ բնապահպանական այս կարևորագույն միջոցառման վերաբերյալ ակնհայտ ապատեղեկատվություն տարածելուց և հանրությանը միտումնավոր տեղեկատվական մանիպուլյացիաների ենթարկելուց»:
Այդուհանդերձ, դժվար է զերծ մնալ նման եզրահանգումներից, երբ գերատեսչությունը կա՛մ ստում է, կա՛մ միտումնավոր մոլորեցնում է հանրությանը:
