Նիկոլ Փաշինյանին՝ պատերազմյան եւ հետպատերազմյան գործողությունների համար առերեւույթ պետական դավաճանություն կատարելու եւ պաշտոնական լիազորություններն անցնելու համար Զինվորական քննչական գլխավոր վարչությունը Փաշինյանին չի կանչում հարցաքննության։

44-օրյա պատերազմի քրեական գործով Նիկոլ Փաշինյանին հարցաքննության կանչելու միջնորդությունը ՀՀ գլխավոր դատախազությունը դեռեւս այս տարվա մայիսին էր բավարարել։ Տուժողների իրավահաջորդների՝ զոհված զինծառայողների ծնողների ներկայացուցիչ, փաստաբան Վահան Հովհաննիսյանը MediaHub-ի հետ զրույցում ասաց, որ Փաշինյանին հարցաքննության կանչելու վերաբերյալ հարցում է արել Զինվորական քննչական գլխավոր վարչություն ու ստացել անտրամաբանական պատասխան։

«Ինձ պատասխանել են, որ իրավունք չունեմ նման հարցում կատարելու, իրենք էլ իրավունք չունեն պատասխանելու, իբրեւ թե՝ սահմանված կարգով գործողությունները կատարվում են։ Օրենքն ասում է՝ ողջամիտ ժամկետներում բավարարված միջնորդությունը չկատարվել չի կարող, բայց քանի որ այն հետպատերազմյան Հայաստանում ամենամեծ ու ծավալուն գործն է, իրենք «ռեզինի» պես փորձում են անընդատ ձգել»,-ասաց նա։

44-օրյա պատերազմում զոհված զինծառայողների ծնողներն ամիսներ շարունակ բողոքի ակցիաներ էին անում պետական կառույցների՝ ՀՀ գլխավոր դատախազության, Քննչական կոմիտեի, Զինվորական քննչական գլխավոր վարչության առջեւ՝ պահանջելով պետական դավաճանության գործի շրջանակներում հարցաքննել Փաշինյանին, ապա՝ մեղադրանք առաջադրել։ Ծնողների համբերության բաժակը լցվել է, ասում է Հովհաննիսյանը, այլեւս անկառավարելի են դառնում այն մտքից, որ արդեն 9 ամիս է միջնորդությունը բավարարվել է, բայց Փաշինյանը չի կանչվում հարցաքննության։

«Ոչ թե իրավական, այլ «քուչայի» տրամաբանությամբ են առաջնորդվում Զինվորական քննչական գլխավոր վարչությունում։ Տղայական ռազբորկայի սկզբունքն է՝ «ձեր ասածով չի լինելու եւ վերջ, անգամ եթե բավարարվել է միջնորդությունը»։ Մեծ դժվարությամբ եմ կարողանում համոզել, որ ծնողները զերծ մնան հնարավոր գործողություններից»,-ասաց փաստաբանը։

Օրերս Ազգային ժողովում MediaHub-ը Փաշինյանին հարցաքննության կանչելու վերաբերյալ հարց ուղղեց նաեւ ՀՀ Քննչական կոմիտեի նախագահի տեղակալ Արսեն Այվազյանին, սակայն վերջինս խուսափեց պատասխանից ու հեռացավ։ Քննչական կոմիտեի մամուլի խոսնակ Վարդան Թադեւոսյանն էլ ավանդական պատասխան տվեց՝ այս պահին տեղեկության չի տիրապետում, հարցերն ուղարկենք գրավոր։

Լիա Սարգսյան