Արևմտյան հեղինակավոր լրատվամիջոցները շարունակում են անտարբերության մատնել Հայաստանի և Արցախի շուրջ զարգացումները: Հիշատակումները Հայաստանի մասով ակտիվանում են միայն այն ժամանակ, երբ դրանք հնարավոր է կապել Վլադիմիր Պուտինի հետ՝ թիրախավորելով նրան:

MediaHub-ն արդեն գրել է, որ Արևմուտքի համար անգամ հետաքրքիր չէր Սոչիում հոկտեմբերի վերջին օրը կայացած ՌԴ, ՀՀ և Ադրբեջանի ղեկավարների եռակողմ հանդիպումը, որի մասին գրվեց միայն պրոտոկոլային լեզվով՝ տեղի ունեցավ սա-սա, որոշվեց՝ սա:

MediaHub-ը, այդուհանդերձ, շարունակում է ուշադրության կենտրոնում պահել արևմտյան մամուլը՝ հասկանալու, թե ինչ են մտածում մեր մասին ու, ամենակարևորը, մեր ապագայի մասին:

Հիմնական շեշտադրումը, ըստ մեր մոնիթորինգի, այն է, որ թեև Հայաստանն ու Ադրբեջանն այժմ կարծես ավելի մոտ են խաղաղության համաձայնագրին, սակայն բանակցությունները շարունակում են ծանր ընթանալ:

Crisisgroup.org-ը հոդված է նվիրել հարցին, թե ինչ իրավիճակ առկա Հայաստանի և Ադրբեջանի միջև սեպտեմբերին սահմանային մահացու բախումներից հետո, արդյո՞ք խաղաղության համաձայնագիրը կարող է իրականություն դառնալ։

Հոդվածագիրը գրում է. «Գրեթե երկու տարի է անցել այն պահից, երբ 2020 թվականի նոյեմբերին Հայաստանի և Ադրբեջանի միջև կնքված հրադադարի համաձայնագիրը վերջ դրեց վեցշաբաթյա դաժան պատերազմին։ Թեև Մոսկվայի միջնորդությամբ կնքվածը կոչված էր վերջ դնելու լայնածավալ մարտական գործողություններին, այն չդադարեցրեց երկու կողմերի միջև զինված բռնությունների կանոնավոր բռնկումները, որոնք գագաթնակետին հասան սեպտեմբերին՝ ընդհանուր սահմանի ողջ երկայնքով մահաբեր բախումներով”:

Calendar.gwu.edu-ն էլ գրում է, որ Ուկրաինայի նկատմամբ Ռուսաստանի ագրեսիայի հետևանքով Եվրասիայի մյուս հակամարտությունները հիմնականում անտեսվել են վերլուծաբանների և լայն հասարակության կողմից:

«2022 թվականի սեպտեմբերի 12-ից հայ-ադրբեջանական սահմանին տեղի ունեցող արյունալի դեպքերը ցույց են տալիս, որ երկու կողմերն էլ միմյանց մեղադրում են հարձակումը սկսելու համար։ Հայաստանի պաշտպանության նախարարությունը հայտարարել էր, որ Վարդենիս, Գորիս, Սոթք և Ջերմուկ քաղաքները ադրբեջանական կողմից ենթարկվել են հրետանու և ծանր զինատեսակների գործադրմամբ հարձակման։ Իր հերթին, Ադրբեջանի պաշտպանության նախարարությունը հայտնել է, որ իրենք միջոցներ են ձեռնարկում «հայկական զինված ուժերի կրակակետերը ճնշելու և առճակատման մասշտաբների ընդլայնումը կանխելու համար»։

2022 թվականի հոկտեմբերի 12-ից սկսած Ֆրանսիայի նախագահ Էմանուել Մակրոնն էլ բազմիցս մեղադրել է Ռուսաստանին Հայաստանի և Ադրբեջանի միջև վերջին բախումները նպատակաուղղված հրահրելու մեջ՝ Հարավային Կովկասի տարածաշրջանում և դրանից դուրս իրավիճակի ապակայունացման ջանքերի շրջանակներում։ Հետխորհրդային պատմության մեջ առաջին անգամ ԵՄ առաքելությունը ժամանել է երկու երկրների սահմանին տիրող իրավիճակին հետևելու համար։ Եվ չնայած նախագահ Ալիևի բողոքներին, ԵԱՀԿ առաքելությունը նույնպես հոկտեմբերի 21-ին ժամանել է տարածք և արդեն հարցազրույց է վերցրել Սյունիքի մարզի բնակիչներից”,- գրում է հոդվածագիրը։

Արևմտյան մամուլը բավականին չեզոք, ինչ-որ տեղ անտարբեր կերպով է լուսաբանում հայ-ադրբեջանական սահմանին տեղի ունեցող իրավիճակը, փորձելով մասնակի ցույց տալ երկու կողմերի դիրքորոշումներն էլ, սակայն նույնը չենք կարող ասել Ռուսաստանի մասով, որի նկատմամբ ակնհայտ են հակառուսական տրամադրությունները: Նպատակն այն է, որ ցույց տան, թե ՌԴ ղեկավարի նպատակը ոչ թե խաղաղության հաստատումն է տարածաշրջանում, այլ իր հնարավորությունների ընդլայնումն ու ամրապնդումը։

Շուշանիկ Միսկարյան