Հանցագործության հատկանիշներ առկա չէին, գրագետ մարդիկ շատ լավ պետք է հասկանային, թե ինչ է ասել պարոն Մամիջանյանը։ Այս մասին այսօր լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանի փաստաբան Սլավիկ Պողոսյանը՝ խոսելով Մամիջանյանի հարցաքննության մասին։ 

«Խախտվում է Հայկ Մամիջանյանի՝ պատգամավորի անձեռնմխելիության իրավունքը»,- ասաց փաստաբանը։

Նա նշեց, որ մինչև Մամիջանյանին հարցաքննության հրավիրելը պետք է ԱԺ-ում բարձրացվեր վերջինիս անձեռնմխեիլության հարցը։ 

«Հիմա փաստացի ապօրինի քրեական հետապնդում է իրականացվում, քննիչն էլ չժխտեց, ակնհայտ է»,- նշեց Պողոսյանը։ 

Հիշեցնենք, որ օրեր առաջ հայտնի դարձավ, որ ԱԺ «Պատիվ ունեմ» խմբակցության ղեկավար Հայկ Մամիջանյանը քննչական կոմիտեից հարցաքննության կանչվելու ծանուցագիր է ստացել։

Իր արած գրառման մեջ Մամիջանյանը նշել է, որ հարցաքննության է կանչվել ՔՕ 330-րդ հոդվածի (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը) 1-ին մասի հատկանիշներով նախաձեռնված քրեական վարույթով:

Վարույթի նախաձեռնման հիմքում, նրա ներկայացմամբ, դրվել են սեպտեմբերի 12-ին Ազգային ժողովում ճեպազրույցի և ելույթի ժամանակ արտահայտած խոսքերը։

«Երևանը փոխվելու է մեր բոլորի՝ իմ, ձեր, դրսում կանգնած քաղաքացիների, հայրենասերների քրտինքով, և եթե Փաշինյանն անմտություն անի, նաև արյամբ»,- ասել էր պատգամավորը։

Մանրամասները՝ տեսանյութում