Ինձ էստեղ հրավիրելու կարիքը բացարձակ չկար։ Բայց պարզվեց մեկ այլ բան, որ, ըստ իմ տեղեկությունների, հաղորդումը ներկայացվել է Հելսինկյան քաղաքացիական ասամբլեայի Վանաձորի գրասենյակի կողմից, որի ղեկավարը Արթուր Սաքունցն է։ Չգիտեի, որ նա իմ արվեստի մեծ ֆանատն է, թող շարունակի նայել, լսել իմ ասածները, գոնե մի օգուտ տա։ Այս մասին այսօր լրագրողների հետ զրույցում ասաց ԱԺ «Պատիվ ունեմ» խմբակցության ղեկավար Հայկ Մամիջանյանը՝ խոսելով իր հարցաքննության մասին։ 

Հիշեցնենք, որ օրեր առաջ հայտնի դարձավ՝ ԱԺ «Պատիվ ունեմ» խմբակցության ղեկավար Հայկ Մամիջանյանը քննչական կոմիտեից հարցաքննության կանչվելու ծանուցագիր է ստացել։

Իր արած գրառման մեջ Մամիջանյանը նշել է, որ հարցաքննության է կանչվել ՔՕ 330-րդ հոդվածի (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը, ինչպես նաև այդ նպատակով նյութեր կամ առարկաներ տարածելը) 1-ին մասի հատկանիշներով նախաձեռնված քրեական վարույթով:

Վարույթի նախաձեռնման հիմքում, նրա ներկայացմամբ, դրվել են սեպտեմբերի 12-ին Ազգային ժողովում ճեպազրույցի և ելույթի ժամանակ արտահայտած խոսքերը։

«Երևանը փոխվելու է մեր բոլորի՝ իմ, ձեր, դրսում կանգնած քաղաքացիների, հայրենասերների քրտինքով, և եթե Փաշինյանն անմտություն անի, նաև արյամբ»,- ասել էր պատգամավորը։

«Պարոն Սաքունցը հավանաբար հայրենասիրություն բառը չի սիրում, ամեն անգամ ինչ-որ նյարդային բաներ է ունենում այդ բառը լսելուց։ Ես Սաքունցի գործունեությունն առանձնապես մեկնաբանելու ցանկություն չունեմ»,- նշեց այսօր Մամիջանյանը։

Ընդդիմադիր խմբակցության ղեկավարի խոսքով՝ տեղի ունեցողը պարզագույն քրեական հետապնդում է։ 

«Նմանօրինակ ճնշումիկների վրա ես թքած ունեմ»,- ընդգծեց քաղաքական գործիչը։

Մանրամասները՝ տեսանյութում