Ֆոն դեր Լայենը գնահատել է Թրամփի՝ մաքսատուրքերի մասին հետաձգումը

ԱՄՆ նախագահ Դոնալդ Թրամփի՝ ներմուծման մաքսերի բարձրացումը 90 օրով հետաձգելու որոշումը կարևոր քայլ էր համաշխարհային տնտեսության կայունացման ուղղությամբ։ Նման կարծիք է հայտնել Եվրահանձնաժողովի (ԵՀ) ղեկավար Ուրսուլա ֆոն դեր Լայենը։

«Ես ողջունում եմ նախագահ Թրամփի հայտարարությունը փոխադարձ մաքսատուրքերը դադարեցնելու մասին։ Սա կարևոր քայլ է համաշխարհային տնտեսության կայունացման ուղղությամբ»,- գրել է նա X-ում։

Ֆոն դեր Լայենն ընդգծել է, որ Բրյուսելը հավատարիմ է մնում «ԱՄՆ-ի հետ կառուցողական բանակցություններին՝ անարգել և փոխշահավետ առևտրի հասնելու համար»:  

ԵՀ ղեկավարը նշել է, որ ԵՄ-ն կենտրոնացած է իր առևտրային քաղաքականության դիվերսիֆիկացման վրա, և որ նաև մտադիր է ակտիվացնել աշխատանքը ԵՄ ներքին շուկայում խոչընդոտները վերացնելու ուղղությամբ:

Ապրիլի 2-ին Թրամփը հայտարարեց 185 երկրների և տարածքների ապրանքների համար մաքսատուրքեր սահմանելու մասին։ Ռուսաստանն այս ցուցակում չկա։ Ապրիլի 5-ից ուժի մեջ են մտել 10%-ի համընդհանուր, ապրիլի 9-ից՝ անհատական, բացի այդ, ԱՄՆ վարչակազմը ապրիլի 3-ից ներմուծվող բոլոր մեքենաների համար սահմանել է 25% մաքսատուրք։