Օգոստոսի լույս 21-ի գիշերը Սիցիլիա կղզու մոտ խորտակվել է Life Saga 39 մետրանոց զբոսանավը, հայտնում են մի շարք լրատվամիջոցներ, մասնավորապես՝ Daily Mail-ը։ Ըստ իտալական La Gazzetta Del Mezzogiorno պորտալի, դրա սեփականատերը ռուսաստանցի գործարար, «Կուզբասռազրեզուգոլ» հոլդինգի համասեփականատեր, «Կրուտրեյդ» ընկերության տնօրենների խորհրդի նախագահ Գենադի Այվազյանն է։

Ինչպես նշում է Daily Mail-ը, օգոստոսի 21-ի գիշերը զբոսանավը խորտակվել է Միլացո քաղաքի մոտ։ Նավի մեջ սկսել է ջուր լցվել, եւ նավապետը աղետի ազդանշան է տվել: Ավելի ուշ եկել է առափնյա պահպանությունը, սակայն այն չի փրկել զբոսանավը։ Չորս ուղեւոր եւ անձնակազմի մեկ անդամ տարհանվել են, իսկ անձնակազմի մնացած չորս անդամները մնացել են նավի վրա՝ որպեսզի վերացնեն ջրի ներհոսքը: Հաջորդ օրը զբոսանավը սկսել է սուզվել, իսկ անձնակազմին տեղափոխել են ափ։

Ըստ Superyacht Times-ի՝ Life Saga-ն (կա My Saga անվան տարբերակ) 2007 թվականին կառուցվել է Մոնակոյում՝ Monaco Yachting & Technologies ընկերության կողմից։ Ամսագրի կայքում նրա էջում կարգավիճակը նշված է «ամբողջովին կործանված», գրում է «Կոմերսանտը»։