Հնդկաստանի անտառներից մեկում արջը հոշոտել է մի կնոջ, խեղել նրա ամուսնուն ու աղջկան, ովքեր փորձել են օգնության ձեռք մեկնել։ Այս մասին հայտնում է Prameyanews.com-ը։

Հարձակումը տեղի է ունեցել երկուշաբթի՝ օգոստոսի 22-ին, Օդիշա նահանգում։ Թանգամ գյուղի տարեց բնակիչ Բուդուլի Մալլիկը գնացել է անտառ՝ վառելափայտ հավաքելու։ Հնդկուհին տնից ոչ հեռու է եղել, երբ արջը հարձակվել է նրա վրա։

Մալլիկի բղավոցները լսել են նրա ամուսին Բունչան և դուստր Սունիտան։ Նրանք շտապել են օգնության, սակայն չեն կարողացել փրկել հարազատին և իրենք էլ ծանր վիրավորվել են։ Արջի հարձակման հետևանքով Բուդուլի Մալլիկը մահացել է, իսկ ամուսինն ու դուստրը ծանր վիճակում տեղափոխվել են Բալիգուդա քաղաքի հիվանդանոց: Դեպքի վայր են ժամանել տեղի անտառտնտեսության աշխատակիցները և  զոհի հարազատներին տվել 14 հազար ռուփի (մոտ 10,5 հազար ռուբլի) գումար։ Միջադեպի հանգամանքների ամբողջական հետաքննությունից հետո զոհի հարազատները կառավարությունից կստանան ևս 400 հազար ռուփի (298 հազար 500 ռուբլի) փոխհատուցում։