Ֆրանսիայի նախագահ Էմանուել Մակրոնը հայտարարել է, որ այժմ մշակվում է Ուկրաինայից Ռումինիայով հացահատիկի դուրսբերման երթուղի. փոխանցում է RIA Novosti-ն:
«Մենք այժմ աշխատում ենք նոր երթուղու վրա, որը կանցնի Ռումինիայով, չէ՞ որ Օդեսան գտնվում է Ռումինիայից մի քանի կիլոմետր հեռավորության վրա… Ռումինիայի հետ մենք կստեղծենք կապող կետ՝ հացահատիկի արտահանման համար», - ասել է Մակրոնը TF1 հեռուստաալիքին տված հարցազրույցում:
Նրա խոսքով՝ այդ դեպքում հացահատիկը հնարավոր կլինի տեղափոխել Դանուբով կամ երկաթուղային ճանապարհով:
Ավելի վաղ Ելիսեյան պալատում հայտնել էին Օդեսայի նավահանգստի ապաարգելափակման օպերացիային մասնակցելու Ֆրանսիայի պատրաստակամության մասին:
ՄԱԿ-ում բազմիցս հայտարարել են հացահատիկի դեֆիցիտի պատճառով պարենային ճգնաժամի սպառնալիքի մասին:
Ֆրանսիայի նախագահը մոտ հեռանկարում չի բացառել իր այցը Ռուսաստան, սակայն նշել է, որ դրա համար պետք է ստեղծվեն նախապայմաններ: