Հարկի հաշվարկում և վճարում տվյալ երկրի կանոնակարգով․ նոր հարկատեսակ էլեկտրոնային հարթակներից առևտրի դեպքում Ֆիզիկական անձանց կողմից էլեկտրոնային հարթակներից առևտուր իրականացնելու դեպքում ավելացված արժեքի հարկը կհաշվարկվի և կվճարվի ՀՀ-ում՝ անկախ նրանից մշտական հաստատություն երկրում առկա է թե ոչ։
Այսօր այս մասին ԱԺ տնտեսական հարցերի մշտական հանձնաժողովի արտահերթ նիստի ժամանակ ասաց ՊԵԿ նախագահ Ռուստամ Բադասյանը։ Վերջինս ներկայացնում է Հարկային օրենսգրքում իրականացվելիք փոփոխությունների առաջարկությունների փաթեթը։
«Նախատեսվում է էլեկտրոնային առևտրի կանոնակարգումների ներդրում։ Ավելացված արժեքի հարկն առաջանում է, որտեղ, որ ֆիզիկական անձը ձեռք է բերել ապրանքը անկախ նրանից, թե էլեկտրոնային հարթակը որտեղ է գրանցված»,-ընդգծեց Ռուստամ Բադասյանը։
ԵԱՏՄ տարբեր երկրների օրենսդրություններով տարբեր կանոնակարգումներ է սահմանված, առաջարկված կանոնակարգումը կա Բելառուսում և Ղազախստանում։
«Այս մասով պետական բյուջեի եկամուտները կավելանան, նշանակալի գումարի մասին է խոսքը, որն այսօր շրջանցում է պետական բյուջեն»,-ասաց Բադասյանը։ Այնուհետև, Պեկ նախագահը ներկայացրեց հաջորդ փոփոխությունը, որն իրականացրել են Կենտրոնական բանկի հետ համատեղ։
«Կուտակային կենսաթոշակների հետ կապված խնդիրն է եղել, հաճախ երկու աղբյուրից պահվում է գումար, երբ մենք հայտնաբերում ենք այդ փաստը, բնականաբար պետք է ֆիզիկական անձին նույնականացնենք ու վերադարձնենք, խնդիր է առաջանում, որ չենք կարողանում ֆիզիկական անձին հայտնաբերել, որպեսզի իր գումարը վերադարձնենք»,-ասաց Բադասյանը։
Նախագծով առաջարկվում է, ԿԲ-ի կողմից ֆիզիկական անձի հաշվեհամարի տրամադրում ՊԵԿ-ին, որի միջոցով հեշտությամբ կփոխանցվի գումարը հասցեատիրոջը։
Մանրմասները՝ տեսանյութում։