Արցախում իրավիճակն անփոփոխ է՝ ճանապարհը փակ է, գազամատակարարում չկա, ժողովուրդն էլ՝ պաշարված, բայց կանգուն են ու կանգնելու ենք մինչև վերջ։ Այս մասին այսօր ՄԱԿ-ի հայաստանյան գրասենյակ դիմաց, լրագրողների հետ զրույցում ասաց ԱՀ ԱԳ նախարար Դավիթ Բաբայանը՝ խոսելով Լաչինի միջանցքի փակ լինելու և Արցախում տիրող իրավիճակի մասին։
Հիշեցնենք, որ արդեն երեք օր է՝ ադրբեջանցի, իբրև թե, բնապահպանները փակել են Լաչինի միջանցքը՝ դժգոհելով, որ նախօրեին իրենց Դրմբոնի և Կաշենի հանքավայրերում դիտարկում անցկացնելու հնարավորություն չի տրվել։
Ավելի վաղ հայտնել էինք, որ Ադրբեջանի կողմից Արցախը Հայաստանին կապող միակ ճանապարհի արգելափակման հետևանքով փաստացի շրջափակված են Շուշիի շրջանի Մեծ Շեն, Հին Շեն, Եղծահող և Լիսագոր համայնքները:
Բաբայանի խոսքով՝ Արցախի իշխանության առաջ բարդ հարցեր են ծառացած և Լաչինի միջանցքի բացումը ևս արդեն այդ հարցերի մեջ է ներառված։
«Իհարկե, աշխատանք է տարվում ճանապարհը բացելու ուղղությամբ։ Մենք էլ տարբեր խողովակներով տարբեր աշխատանքներ ենք տանում։ Ճիշտ չի լինի ասել, թե կոնկրետ ինչ աշխատանքներ ենք տանում, ում հետ ինչ ենք քննարկում։ Պարզ է, որ ռուս խաղաղապահներն ամենաշահագրգռվածն են, որ ճանապարհը բացվի, չէ որ իմիջային հարվածներն առաջինը հենց իրենց է գալիս։ Չեմ ուզում անառողջ, աննորմալ քննարկումների մեջ մտնենք՝ ռուսամետ, արևմտամետ, էս մեկն ա մեղավոր, էն մեկն ա մեղավոր, հերիք ա, հոգնել ենք արդեն»,-ասաց նա։
Հարցին, թե ով է ի վերջո պատասխանատուն ստեղծված իրավիճակի, վերջինս պատասխանեց․ «Չգիտեմ՝ Ձեր հարցից ահաբեկվեմ, թե ստեղծված իրավիճակից։ Այսինքն՝ ո՞վ է պատասխանատուն․ Ադրբեջանն ու Թուրքիան, ուրիշ էլ ո՞վ։ Ադրբեջանի պահանջը հստակ է՝ ուզում են խեղդել Արցախը, ուզում են հանքը փակվի, իսկ սա մեր ամենամեծ գործարանն է, բյուջեի ապահովող ամենակարևոր աղբյուրը։ 120 հազար մարդ պաշարված է և կանգնած է սովամահության առջև»։
Մանրամասները՝ տեսանյութում