Ադրբեջանը կոպտորեն խախտում է եռակողմ հայտարարության գրեթե բոլոր կետերը։ Այդ մասին այսօր կառավարության նիստի ընթացքում ասաց Նիկոլ Փաշինյանը։
Նրա խոսքով՝ հայտարարության ութերորդ կետի համաձայն՝ պետք է տեղի ունենար ռազմագերիների, պատանդների փոխանակում, բայց առնվազն 33 գերիների թշնամին հրաժարվում է հանձնել Հայաստանին։
«Սա նաև հումանիտար իրավունքի կոպիտ խախտում է։ Բացի այդ իններորդ կետը ևս խախտվում է, քանի որ Ադրբեջանը պնդում է, թե ՀՀ-ն պետք է միջանցք տրամադրի։ Բայց մեր երկրի տարածքով որևէ միջանցքի գոյություն նոյեմբերի իննի հայտարարությամբ չի նախատեսվում»,- ասաց Փաշինյանը։
Նրա խոսքով՝ անհեթեթ ու տգետ են պնդումները, թե Հայաստանն այդ առումով բանավոր խոստում է տվել որևէ մեկին։
«Եռակողմ հայտարարությունը ՀՀ սուվերենությունը որևէ կերպ կասկածի տակ չի դնում»,- շեշտեց նա։
Ըստ Փաշինյանի՝ Ադրբեջանի կողմից իր իսկ պարտավորությունների քրոնիկ խախտումը միջազգային հանրությանը ներկայացնելն ու նրանից արձագանք ստանալը ՀՀ իշխանության հիմական նպատակներից մեկն է։
Այդ առումով, նրա խոսքով, շատ կարևոր է երեկ ԱԺ-ում ընդունված հայտարարությունը, որին ինքն ամբողջապես աջակցում է։
«Ուզում եմ շնորհակալություն հայտնել բոլոր այն երկրներին ու միջազգային կազմակերպություններին, որոնք գնահատական են տվել Ադրբեջանի քաղաքականությանը։ Բայց, առնվազն տարօրինակ է մի շարք բարեկամ երկրների լռությունն այս առումով»,- նկատեց Նիկոլ Փաշինյանը։
Մանրամասները՝ տեսանյութում։