Freedom House-ը հրապարակել է «Ազատությունը համացանցում» տարեկան զեկույցը, համաձայն որի Հայաստանը դասվում է ազատ երկրների շարքին:

Զեկույցում Հայաստանի վերաբերյալ մասնավորապես նշվում է. «Տեղական և միջազգային քաղաքացիական հասարակության խմբերը համատեղեցին հանրային դատապարտումը մասնավոր ջատագովության հետ՝ համոզելու կառավարությանը չեղյալ համարել ծանր վիրավորանքի մասին հոդվածը Քրեական օրենսգրքում՝ ընդունված 2021թ. հուլիսին: Օրենքը, որը քրեականացնում էր պետական պաշտոնյաներին և հասարակական գործիչներին ուղղված վիրավորանքները, կիրառվել է ամբողջ տարվա ընթացքում՝ քրեական պատասխանատվության ենթարկելու այն օգտատերերին, որոնք ուղղել են քննադատական մեկնաբանություններ հատկապես վարչապետ Նիկոլ Փաշինյանի հասցեին»։

Այս առումով՝ դժվար է հեղինակավոր կազմակերպության հետ վիճելը. Հայաստանում իսկապես դադարեց քրեորեն պատժելի լինել Փաշինյանին քննադատելը:

Բայց Freedom House-ի օբյեկտիվությունն այստեղ էլ վերջանում է, որովհետև «ազատ» Հայաստանում Փաշինյանի ընդդիմսխոսներին հիմա պարզապես ծեծում են՝ օրը ցերեկով, փողոցում:

Ընդդիմադիր գործիչ Էդգար Ղազարյանը պնդում է՝ երեկ առավոտյան իրենց շենքի բակում երկու անձ հարձակվել է իր վրա, հայհոյանքներ տվել ու սկսել հարվածել։ Ընդդիմադիր գործչի խոսքով՝ իրեն գցել են գետնին ու հիմնականում գլխին հարվածել, հետո հեռացել են։ Ղազարյանն ասում է՝ հարձակվողները որևէ պահանջ իրեն չեն ներկայացրել, ու պնդում է՝ հարձակումն իր քաղաքական գործունեության պատճառով է:

Քննչական կոմիտեն, իհարկե, վարույթ է հարուցել ու գործով զբաղվում է, բայց գրեթե ակնհայտ է, որ իշխանությունն այս հանցագործությունը չի բացահայտելու ու դրա համար արդեն ստեղծվում են քարոզչական հիմքեր:

Նախ, իշխանության քարոզիչները ծաղրում են Ղազարյանին, իսկ լավագույն դեպքում՝ սլաքը ուղղում են «նախկինների» դեմ: Այս ձեռագիրը մատնում է իշխանության մտադրությունը՝ տեղի ունեցած հանցագործության հետևում պարզորոշ ցույց տալով հենց Փաշինյանի թիմի «ականջները»:

Վահրամ Բագրատյան