Արցախի նախագահ Արայիկ Հարությունյանը երեկ Ազգային ժողովին է ներկայացրել երևանյան հանդիպումների մանրամասները։
Արայիկ Հարությունյանը ևս մեկ անգամ վերահաստատել է, որ Արցախի իշխանությունները հավատարիմ են Արցախի ժողովրդի ինքնորոշման իրավունքի իրացման միջոցով Արցախի անկախության միջազգային ճանաչմանը հասնելու նպատակին։
Մինչ այդ, ԼՂՀ նախագահը երևանյան հանդիպումների մասին խոսել է կառավարության նիստում:
Նշվում է, որ «նախագահը կարևորել է Հայաստանի Հանրապետության հետ համակարգված աշխատանքը ինչպես ներքին խնդիրները հաղթահարելու, այնպես էլ արտաքին քաղաքական մարտահրավերներին դիմակայելու հարցում»:
Իհարկե, պաշտոնական լրահոսը որոշակի կոնտրաստ է ստեղծում:
Այդ ինչպե՞ս է Հարությունյանը «համակարգված աշխատելու» Հայաստանի կառավարության հետ, երբ Ստեփանակերտը հավատարիմ է Արցախի անկախության միջազգային ճանաչման օրակարգին, իսկ Փաշինյանի իշխանությունն այնքան է իջեցրել նշաձողը, որ անգամ արդեն չի խոսում Արցախի ժողովրդի անվտանգության ու իրավունքների, էլ չասած՝ անկախության օրակարգի մասին:
Մյուս կողմից, պաշտոնական Երևանի ու Ստեփանակերտի միջև առաջացել է ինստիտուցիոնալ խզում, որը հաղթահարելու որևէ տարբերակ գոյություն չունի: Մինչ Երևանից առաջարկում են «նշաձողի իջեցում», Արցախի հասարակությունը Հարությունյանից պահանջում է կոնկրետ դիրքորոշում, ինչը ենթադրում է սահմանազատում Փաշինյանի պարտվողական քաղաքականությունից:
Գրեթե հարյուր տոկոսով կանխատեսելի է, որ առաջիկա օրերին Ստեփանակերտում կվերսկսվեն ընդհատված հանրահավաքները, որոնք կարող են հնարավոր երկու լուծում ունենալ:
Կամ որոշակի քաղաքական հանգուցալուծումներ տրվելու են Երևանում, կամ էլ՝ Ստեփանակերտի շարժումը տարածվելու է նաև Երևանում: Ընդդիմադիր շրջանակներում արդեն իսկ լուրեր են պտտվում այն մասին, թե նոյեմբերի 9-ին համաժամանակյա բազմամարդ հանրահավաքներ են տեղի ունենալու Երևանում և Ստեփանակերտում:
Վահրամ Բագրատյան