Վարչապետ Նիկոլ Փաշինյանը թվիթերյան գրառմամբ Ադրբեջանին մեղադրել է Հայաստանի վրա նոր հարձակման պատրվակ ստեղծելու համար:
«Ադրբեջանը շարունակաբար Հայաստանին է վերագրում հրադադարի իր իսկ խախտումները։ Ակնհայտ է, որ սա Հայաստանի դեմ նոր ռազմական ագրեսիայի պատրվակի ստեղծում է»,- գրել է Փաշինյանը ու եզրակացրել. «հրադադարը պահպանելու և սահմանների անվտանգությունն ապահովելու համար անհրաժեշտ է մշտական միջազգային մեխանիզմ»։
Վերջին օրերին Երևանն ու Բաքուն գրեթե ամենօրյա ռեժիմով միմյանց են մեղադրում դիրքերը գնդակոծելու համար։ Նույն իրավիճակն էր նաև սեպտեմբերյան բախումներից առաջ։
Բացի այդ, երեկ Երևանի ու Բաքվի միջև հրապարակային «պատերազմի» ևս երկու առիթ եղավ:
Նախ վարչապետ Նիկոլ Փաշինյանը Թվիթերում գրեց, որ Արևելյան Ադրբեջանի և Նախիջևանի միջև կապն ապահովելու նպատակով հայ-ադրբեջանական սահմանին 3 անցակետեր բացելու վերաբերյալ որոշման նախագիծը մի քանի ամիս է, պաշտոնապես շրջանառվում է, և Երևանը սպասում է Ադրբեջանի դրական արձագանքին։ Պաշտոնական Բաքուն արձագանքնեց՝ այս առաջարկն անիրատեսական է ու կեղծ, և դարձյալ ճանապարհ պահանջեց այսպես կոչված Զանգեզուրի միջանցքով։
Ավելի ուշ էլ «բախվեցին» երկու երկրների ՊՆ-ները, իհարկե՝ դեռ հայտարարությունների մակարդակում:
Ադրբեջանի պաշտպանության նախարարությունը պնդում է, որ հայկական կողմն, իբր, լրացուցիչ ուժեր՝ հետևակ և հրետանի է կուտակում Դաշքեսանի ուղղությամբ: Ադրբեջանի պաշտպանական գերատեսչությունը հայտարարել է, թե «տարածաշրջանում հնարավոր սրման համար պատասխանատվությունը Հայաստանի ռազմաքաղաքական ղեկավարությունն է կրելու»:
Երևանը նշում է, որ հայկական կողմի քայլերն իրականացվել են տվյալ գոտում ադրբեջանական հրետանային և զենիթային լրացուցիչ միջոցների տեղակայումից հետո և կրում են բացառապես պաշտպանական բնույթ: Հայկական կողմի գործողությունները իրադրությունը լարելու նպատակ չունեն, շեշտում է Պաշտպանության նախարարությունը՝ ընդգծելով՝ ադրբեջանական կողմի՝ հիշատակված միջոցները տվյալ ուղղությունից դուրս բերելու դեպքում, հայկական կողմը ևս դուրս կբերի իր լրացուցիչ միջոցները: «Հայկական կողմը պատրաստ է տվյալ հարցի շուրջ բանակցել», - ասված է հայտարարությունում:
Պրահայի փխրուն պայմանավորվածություններն, ըստ էության, չեղարկվում են, եթե նույնիսկ եվրոպացի դիտորդները պատրաստվում են ժամանել Հայաստան:
Ռազմական նոր բախումների ռիսկերը մեծանում են...
Վահրամ Բագրատյան