Ես հիմա քաղաքում եմ, ոչ մի կրակոց չկա, ժողովուրդն իր կյանքով է ապրում։ Այս մասին այսօր MediaHub.am-ի հետ զրույցում ասաց Ջերմուկի փոխքաղաքապետ Կարեն Սարգսյանը՝ խոսելով թշնամու վերջին ագրեսիայից հետո համայնքում տիրող վիճակի մասին։
Հիշեցնենք, որ հոկտեմբերի 14-ին՝ ժամը 01:30-ի սահմաններում, Ադրբեջանի ԶՈՒ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի արևելյան հատվածում տեղակայված հայկական դիրքերի ուղղությամբ: ՀՀ ԶՈՒ ստորաբաժանումները դիմել են պատասխան գործողությունների և լռեցրել են հակառակորդի կրակը:
Սարգսյանը նշեց, որ կրակոցները Ջերմուկում չեն լսվել։
Անդրադառնալով սեպտեմբերի 13-ի հարձակումից հետո կրած վնասներին, վերջինս ընդգծեց, որ գազամատակարարման, ջրամատակարարման, էլեկտրաէներգիայի, կապի հետ կապված խնդիրները հրատապ կարգրով վերականգնվել են։
«Կան վնասներ, որոնց վերականգնումը ժամանակատար գործ է, բայց մենք աշխատում ենք այդ ուղղությամբ։ Մնացյալ խնդիրները գնահատվում են, թերություններն աստիճանաբար վերացնում ենք»,-ասաց նա։
Լիաննա Թորոսյան