Մեծ Բրիտանիայի արտաքին գործերի նախարար Լիզ Թրասը երկուշաբթի՝ հունիսի 13-ին, ներկայացրել է օրենքի նախագիծ, որը միակողմանիորեն կփոխի Brexit-ի համաձայնագրի մաս է կազմող Հյուսիսային Իռլանդիայի վերաբերյալ արձանագրությունը. հայտնում է TASS-ը։
Քննարկելով նախաձեռնությունը՝ ԱԳ նախարարը նշել է, որ այն թույլ կտա փոփոխություններ կատարել Բելֆաստի համաձայնագրում (Ավագ ուրբաթի համաձայնագիր) և պահպանել քաղաքական կայունությունը Հյուսիսային Իռլանդիայում՝ վերջ դնելով այն իրավիճակին, որտեղ հյուսիսիռլանդացիներին այլ կերպ են վերաբերվում, քան երկրի մյուս բնակիչներին։
«Բացի այդ օրինագիծը երաշխավորում է երկրի տարածքային ամբողջականությունը և դատարանների գերակայությունը»,- նշել է նախարարը։
Գործակալությունը պարզաբանում է, որ 2020 թվականի դեկտեմբերին կնքված առևտրային համաձայնագրի համաձայն՝ Հյուսիսային Իռլանդիան՝լինելով Մեծ Բրիտանիայի կազմում, լքել է ԵՄ-ն, մնացել է Մաքսային միության անդամ։
Այս հանգամանքը թույլ տվեց խուսափել Իռլանդիայի և Օլսթերի միջև սահմանի ձևավորումից, սակայն իշխանությունները ստիպված էին Հյուսիսային Իռլանդիայի նավահանգիստներում մի շարք հսկողության ընթացակարգեր ներմուծել երկրի այլ մասերից ապրանքների փոխադրման համար։