Ղրղզստանի և Տաջիկստանի սահմանին փոխհրաձգություն է տեղի ունեցել սահմանապահների միջև. այդ մասին հայտնում է РИА Новости-ն՝ հղում անելով Ղրղզստանի սահմանապահ ծառայության մամուլի կենտրոնին:

Վաղ առավոտյան Բատկենի շրջանում, Տաջիկստանի սահմանային զորքերի Կեխ դիրքի կողմից կրակոց է արձակվել ղրղզական Բուլակ-Բաշի դիրքի ուղղությամբ: Ի պատասխան՝ կրակ է բացվել:

Կողմերի ներկայացուցիչները հեռախոսազրույց են ունեցել, որից հետո դեպքի վայր են մեկնել կողմերի սահմանային ջոկատների պետերը: Սակայն տեղի ժամանակով 7.50-ին (Մոսկվայի ժամանակով՝ 4.50-ին) տաջկական կողմը կրկին փոխհրաձգություն է սկսել՝ նռնականետերի և ականանետերի կիրառմամբ: Ժամը 8.10-ին փոխհրաձգությունը դադարել է:

Այժմ Բիշքեկի և Դուշանբեի ներկայացուցիչները հանդիպում են անցկացնում՝ միջադեպի պատճառները պարզելու և իրադրության էսկալացիա թույլ չտալու համար:

Երկու երկրների միջև սահմանային միջադեպեր հաճախ են տեղի ունենում, պատճառը չսահմանազատված հատվածներն են: