«Սուրմալու» առևտրի կենտրոնում շարունակվում են որոնողական աշխատանքները։ Դեպքի վայրում աշխատում են ԱԻՆ ՓԾ հատուկ նշանակության փրկարարական աշխատանքների իրականացման կենտրոնի ծառայողները, «Կարմիր Խաչ» մարդասիրական կազմակերպության կամավորները։ Այդ մասին ՖԲ իր էջում գրել է ԱԻ նախարար Արմեն Փամբուխչյանը:
ՔՊ-ի կադրային խայտառակ, որևէ տրամաբանություն չունեցող քաղաքականության ևս մեկ վառ օրինակ մասնագիտությամբ իրավաբան, ԱԻՆ համակարգի հետ որևէ կապ չունեցող Արմեն Փամբուխչյանի նշանակումն էր ԱԻ նախարար: ԱԻՆ-ը կարևորագույն կառույցներից է, որը պետք է խաղաղ ժամանակաշրջանում և պատերազմական իրավիճակում կարևոր գործառույթներ կատարի, սակայն ՔՊ-ական կադրերով այդ կարևոր ինստիտուտը «հյուծվում» է:
Սուրմալուի դեպքը «լակմուսի թուղթ» էր, թե ինչպես է գործում ԱԻՆ-ը ՔՊ-ական նախարարի օրոք: Պայթյունից հետո Սուրմալույում բարդակ էր տիրում՝ ՀՀ շարքային քաղաքացիներն առաջինն էին օգնություն ցույց տալիս տուժածներին: Դեպքից հետո էլ ՀՀ քաղաքացիները, կամավորականները մեծ աշխատանք իրականացրեցին՝ այդ աղետը հաղթահարելու ուղղությամբ: ԱԻ նախարարն աչքի ընկավ PR գործողություններով՝ դեպքի վայրում մի պահ «վատանալով», այնուհետև առանց որևէ հիմնավորման հայտարարելով, որ Սուրմալույում ահաբեկչությունը բացառված է: ԱԻ նախարարն այդ ոլորտի մասնագետ չէ՝ ԱԱԾ-ն կամ այլ ուժային կառույց չի ներկայացնում և առանց որևէ հետաքննության հայտարարել, որ դա ահաբեկչություն չէ, մեղմ ասած, տեղին չէր:
ԱԻՆ-ում տիրող իրավիճակը Փաշինյանի կադրային քաղաքականության «գոհարներից» է, երբ պատասխանատու պաշտոնների են նշանակվում ՔՊ-ականներ՝ շեշտը դրվում է միայն կուսակցական պատկանելիության վրա՝ առանց հաշվի առնելու մասնագիտական կարողություններն ու այդ ոլորտում առկա փորձը:
Վահրամ Բագրատյան