ՀՀ մարդու իրավունքների պաշտպան Քրիստիննե Գրիգորյանն օրերս դիմել էր Սահմանադրական դատարան՝ վիճարկելու ազգային անվտանգության մարմիններում ծառայողների, զինծառայողների, դատախազների, դատավորների և ՍԴ դատավորների համար կրոնական կազմակերպություններին անդամակցության արգելքը։
Ինչպես ավելի վաղ գրել էր ՀՀ արդարադատության նախկին նախարար Գևորգ Դանիելյանը, դիմումը, թերևս, կբավարարվի, քանզի 2020 թ. փետրվարի 18-ին ՍԴ-ն արդեն իսկ բավարարել է նույնաբովանդակ դիմում՝ կապված ոստիկանության ծառայողների հետ։
Ինչպիսի վերաբերմունք ունի այս հարցին Մայր Աթոռ Սուրբ Էջմիածինը. MediaHub-ի հարցին ի պատասխան, Մայր Աթոռի Տեղեկատվական համակարգի տնօրենի ժամամակավոր պաշտոնակատար Տեր Համբարձում քահանա Դանիելյանը նշեց, որ ՄԻՊ-ի՝ ՍԴ դիմելու մասին լրատվամիջոցներից են տեղեկացել։
«Ժամանակին այդ օրենքներն ընդունվել էին անհրաժեշտությունից ելնելով՝ նկատի ունենալով մեր երկրի առջև ծառացած անվտանգային խնդիրները։ Հարց է ծագում՝ տիրող ներկայիս ծանր կացության մեջ արդյո՞ք այդ խնդիրներն ու իրավիճակներն այլևս հաղթահարված են։ Հետևությունները թողնում ենք ձեզ»,-նշեց քահանա Դանիելյանը։
Հիշեցնենք, որ դիմումում մասնավորապես, նշվում է, որ արհեստակցական միություններին անդամակցելու արգելքը չի բխում նշված ծառայության տեսակների բնույթից և զրկում է աշխատողներին իրենց իրավունքների կոլեկտիվ պաշտպանության կարևորագույն միջոցից՝ հակադրվելով միավորումների ազատության բուն էությանը։
Նմանապես, Պաշտպանը վիճարկել է, որ ազգային անվտանգության մարմիններում ծառայությունը և զինվորական ծառայությունն ինքնին անհամատեղելի չեն կրոնական կազմակերպությանն անդամակցելու կամ այն ստեղծելու իրավունքի հետ։ Հիմնվելով վերոնշյալ որոշման, ինչպես նաև միջազգային իրավական փաստաթղթերի դրույթների և միջազգային ատյանների արտահայտած դիրքորոշումների վերլուծության վրա՝ դիմումով արձանագրվել է, որ վկայակոչված նորմերի նախատեսումը հանգեցրել է վերոնշյալ անձանց կրոնի ազատության և միավորումների ազատության անհամաչափ սահմանափակման։ Դիմումով Պաշտպանը վիճարկում է վկայակոչված նորմերի համապատասխանությունը ՀՀ Սահմանադրության 41-րդ, 45-րդ, 78-րդ, 79-րդ հոդվածներին։
Լիաննա Թորոսյան