Բերձորի, Աղավնոյի եկեղեցիները հայտնվել են վանդալիզմ իրականացնողների ձեռքերում, ամեն ինչ պետք է արվի պաշտպանելու համար։ Այս մասին MediaHub.am-ի հետ զրույցում ասաց Քաշաթաղի շրջանի հոգևոր հովիվ Տեր Բենիամին քահանա Ծատուրյանը։ 

Նա հիշեցրեց, որ ադրբեջանական մամուլում արդեն իսկ շրջանառվում է՝ Բերձորի Սուրբ Համբարձման եկեղեցին Ադրբեջանը պատրաստվում է վերածել մզկիթի։ Նշենք, որ ադրբեջանական նախագծով՝ ապամոնտաժվում են գմբեթի զանգակատունը, վեղարը, կառուցվում են երկու մինարեթներ։ 

Ինչ վերաբերում է հարցին, թե ինչ անելիք ունի եկեղեցին նման զարգացումները կանխելու համար, Տեր Բենիամինը նշեց․

«Եկեղեցին պատերազմից առաջ, հետո էլ միջազգային ատյաններին միշտ էլ դիմում է, որ ադրբեջանական կառավարության կողմից հայկական սրբավայրերը ոչնչացվում են։ Եկեղեցիների պահպանման հարցը փորձելու ենք պահել միջազգային ատյանների ուշադրության կենտրոնում»,-ասաց նա։ 

Բերձորի եկեղեցուց հեռացվել են խաչերը, խաչքարերը։ 

«Մի քանի բան, ինչը շարժական էր, հնարավոր էր տարհանել՝ հեռացրել ենք, որ չպղծվի, բայց եկեղեցիները կանգուն են»,-ասաց նա։ 

Այժմ քննարկվում է Բերձորից, Աղավնոյից ապամոնտաժված խաչքարերը Ստեփանակերտի մայր եկեղեցու և մյուս եկեղեցու բակ տեղափոխելու հարցը, այլ տարբերակներ ևս քննարկվում են։ 

Անդրադառնալով հարցին, թե արդյոք քննարկվել է, որպեսզի ռուս խաղաղապահների միջնորդությամբ հայերը կարողանան այցելել հանձնված գյուղերի եկեղեցիներ,  Տեր Բենիամինն ասաց, որ իրենց հետ նման հարց չի քննարկվել։ 

Նշենք, որ Բերձորի եկեղեցում վերջին պատարագը մատուցվել է օգոստոսի 18 –ին, այն բնակիչները անվանում էին հրաժեշտի պատարագ։ 

Սուրբ Համբարձման եկեղեցին կառուցվել է 1996-98 թվականներին։ Եկեղեցին մշտապես մարդաշատ է եղել, կատարվել են հոգևոր տարբեր արարողություններ։ Եկեղեցու բակում էին եղեռնի 90-ամյակին և Սպիտակի երկրաշարժին նվիրված խաչքար-հուշակոթողները։ Աղավնո գյուղի Ս. Նահատակաց եկեղեցին օծվել է 2002-ին, հարևանությամբ Արցախյան ազատամարտի հուշահամալիրն էր։ 

Հիշեցնենք, որ 4 տասնյակից ավելի հուշակթողներ, խաչքարեր Բերձորից , Աղավնոյից, Ներքին Սուսից տարհանվել են։ Բերձորում, Աղավնոյում արդեն իսկ ադրբեջանական ստորաբաժանումներն են։ 

Անի Գևորգյան